Read Mokanda na Bomoi Yobo 14 Bible Online

Yobo 14 - Mokanda na Bomoi bible

Yobo 14

¹Moto oyo abotama na mwasi azalaka kaka na mikolo moke oyo mpe etonda na pasi.

²Akolaka mpe akawukaka lokola fololo, awumelaka te lokola elili ya lipata oyo elekaka.

³Olingi kaka kolandela ekelamu ya boye ? Olingi kaka komema ye liboso na Yo mpo na kosambisa ye ?

⁴Nani akoki kobimisa bopeto kati na mbindo ? Moko te !

⁵Mikolo ya moto ekatama ; okata motango ya basanza na ye mpe otia mondelo oyo akoki koleka te.

⁶Longola miso na Yo mosika na ye mpe tika ye, ye moko, kino tango akozwa lifuti ya mosala na ye lokola moto oyo asalaka kaka mpo na lifuti.

⁷Nzete ezalaka kutu na mwa elikya : ata bakati yango, ebimaka lisusu mpe ebotaka bitape ya sika ;

⁸misisa na yango ekoki konuna na se ya mabele, mpe eteni na yango oyo etikalaka ekoki kokufa kati na mabele,

⁹nzokande soki kaka ezwi mayi, ekobimisa mito mpe ekobota bitape lokola nzete ya sika.

¹⁰Kasi moto akufaka mpe aninganaka lisusu te, akataka motema mpe azalaka lisusu na bomoi te.

¹¹Ndenge mayi esilaka na liziba to ndenge mayi ekawukaka,

¹²ndenge wana mpe moto akufaka mpe atelemaka lisusu te, akolamuka lisusu te mpe bakoki lisusu kolamusa ye te, tango nyonso likolo ekozala.

¹³Soki kaka obombaki ngai na se ya bakufi mpe otikaki ngai kuna kino kanda na Yo esila ! Soki kaka okatelaki ngai tango mpo ete, na sima na yango, okanisa ngai lisusu !

¹⁴Nzokande, soki moto akufi, boni, akoki lisusu kozala na bomoi ? Nakozela kino lolenge na ngai ebongwana.

¹⁵Okobenga ngai, mpe ngai, nakondima ; okozala na posa makasi ya ekelamu ya maboko na Yo.

¹⁶Solo penza, okotanga makolo na ngai, kasi okolandela lisusu masumu na ngai te.

¹⁷Mabe na ngai ekokangama kati na saki, mpe okozipa masumu na ngai.

¹⁸Kasi, ndenge ngomba esilaka mpe ekweyaka, ndenge libanga elongwaka na esika na yango,

¹⁹ndenge mayi eliaka mabanga, ndenge mayi oyo etiolaka ememaka mabele, ndenge wana mpe obebisaka elikya ya moto.

²⁰Olongaka ye mbala moko, mpe akendaka na ye ; obebisaka elongi na ye mpe obenganaka ye.

²¹Soki bana na ye ya mibali bazwi lokumu, ayebaka na ye yango te ; soki basambwisi bango, amonaka na ye yango te.

²²Ayokaka kaka pasi kati na nzoto na ye, mpe motema na ye esalaka kaka matanga mpo na ye moko. »