Read Mokanda na Bomoi Yobo 16 Bible Online

Yobo 16 - Mokanda na Bomoi bible

Yobo 16

¹Yobo azongisaki :

²« Nayoki maloba ebele ya lolenge oyo ; bino nyonso bozali babondisi mabe.

³Kino tango nini bokotika koloba maloba ya pamba-pamba boye ? Likambo nini etindi yo lisusu kozongela maloba ?

⁴Ngai mpe nakokaki koloba lokola bino, soki bozalaki na esika na ngai, nakokaki kobimisa maloba ebele mpe koningisa moto mpo na bino.

⁵Kasi monoko na ngai elingaki kolendisa bino, mpe bibebu na ngai elingaki koningana mpo na kokitisa bino mitema kati na pasi.

⁶Nzokande, soki nalobi, pasi na ngai ekosila te ; bongo soki nakangi monoko nde pasi yango elongwe na bomoi na ngai ?

⁷Oh Nzambe ! Solo penza, olembisi ngai ! Obebisi ndako na ngai nyonso,

⁸ofini-fini ngai makasi penza, mpe kokonda na ngai ekomi ata kotatola mpe kofunda ngai na miso ya bato !

⁹Kanda na Yo ezali kopasola mpe kobundisa ngai, okomi ata kolia minu mpo na kosala ngai mabe mpe kotala ngai na miso mabe lokola nde nazali monguna na yo.

¹⁰Bato mabe bafungoli minoko mpo na kotiola ngai, bakomi kobeta ngai bambata na matama mpo na kosambwisa ngai, bango nyonso basaleli ngai likita.

¹¹Nzambe akabi ngai na maboko ya bato mabe mpe abwaki ngai na manzaka na bango.

¹²Makambo nyonso ezalaki kotambola malamu mpo na ngai, kasi aningisi ngai, akangi ngai na kingo mpe apanzi ngai, akomisi ngai lokola eloko na Ye ya komekela makonga ;

¹³makonga na Ye ezingeli ngai, atoboli-toboli libumu na ngai, mpe na mawa te, asopi makila na ngai na mabele.

¹⁴Tango nyonso, azali kaka kozokisa ngai mpe kokweya likolo na ngai lokola elombe.

¹⁵Natongi elamba na ngai ya saki na poso ya nzoto na ngai mpe nakundi lokumu na ngai nyonso na se ya putulu.

¹⁶Likolo ya kolela, elongi na ngai ekomi motane, mpe molili ezingeli miso na ngai.

¹⁷Nzokande, maboko na ngai etikala kosala moto mabe te, mpe libondeli na ngai ezalaki kosalema na motema peto.

¹⁸Oh mabele, kozipa makila na ngai te ! Kotika te ete koganga na ngai ezwa tango ya kopema !

¹⁹Wuta sik’oyo, motatoli na ngai azali na Likolo, molobeli na ngai azali na Lola.

²⁰Baninga na ngai bakomi koseka ngai ; nazali nde kolela epai ya Nzambe na mpinzoli.

²¹Boni, ezali solo na molobeli oyo akoki kolobela moto liboso ya Nzambe ndenge moto alobelaka moninga na ye ?

²²Solo, motango ya mibu na ngai ekomi pene ya kosila, mpe nakokende na ngai na nzela oyo bato bazongaka lisusu te.