Read Mokanda na Bomoi Yobo 18 Bible Online

Yobo 18 - Mokanda na Bomoi bible

Yobo 18

¹Bilidadi, moto ya Shuwa, azwaki maloba mpe alobaki :

²« Kino tango nini okoloba maloba ya boye ? Kanisa nanu malamu, bongo tokosolola.

³Mpo na nini komona biso lokola banyama ? Boni, tozali nde bazoba na miso na yo ?

⁴Awa, likolo ya kanda na yo, ozali komipasola na biteni, basundola mokili to balongola mabanga na bisika na yango likolo na yo ?

⁵Solo, mwinda ya moto mabe ekufaka, moto na yango etikaka kopela.

⁶Pole ekomaka molili kati na ndako na ye, mpe mwinda oyo epelaka pembeni na ye ekufaka.

⁷Makasi ya matambe na ye esilaka, makanisi na ye moko ekweyisaka ye.

⁸Makolo na ye ekangisaka ye na monyama, bongo abundaka-bundaka kati na madusu na yango.

⁹Motambo ekangaka matambe na ye, mpe singa na yango ekangaka ye makasi.

¹⁰Singa ya motambo ebombama na se ya mabele mpo na ye, mpe batia motambo na nzela na ye.

¹¹Somo elandaka ye bisika nyonso oyo atambolaka.

¹²Nzala esilisaka makasi na ye, mpe pasi ya ndenge na ndenge ezalaka pembeni na ye soki akweyi.

¹³Pasi eliaka poso ya nzoto na ye mpe bokono oyo ebomaka ebebisaka biteni ya nzoto na ye.

¹⁴Balongolaka kati na ndako na ye biloko nyonso ya motuya, oyo atielaka motema, mpe akendaka kokutana na bakonzi ya kufa.

¹⁵Ndako na ye etikalaka na eloko moko te, mpe fofolo[2] ezalaka ya kopanzana kati na ndako yango.

¹⁶Misisa na ye ekawukaka na se ya mabele, mpe, na likolo, bitape na ye elembaka.

¹⁷Bakanisaka ye lisusu te na mokili, kombo na ye etangamaka lisusu te na mabele.

¹⁸Babenganaka ye na pole mpo ete akende na molili, mpe balongolaka ye na mokili.

¹⁹Azalaka na bana to bakitani te kati na bato na ye, azalaka ata na moto moko te oyo atikala na bomoi, na esika oyo avandaka.

²⁰Bato ya weste bazalaka na somo ya kotala bomoi na ye, mpe bato ya este batondaka na kobanga.

²¹Tala, solo, ndenge suka ya moto mabe ezalaka, mpe bomoi ya moto oyo ayebi Nzambe te. »