Read Mokanda na Bomoi Yobo 19 Bible Online

Yobo 19 - Mokanda na Bomoi bible

Yobo 19

¹Yobo azongisaki :

²« Kino tango nini bokotungisa ngai mpe kolembisa ngai na maloba na bino ?

³Tala, botioli ngai mbala zomi, mpe bozali kobundisa ngai na soni te.

⁴Soki ezali penza ya solo ete nabungi nzela, mbeba na ngai etali kaka ngai moko.

⁵Soki mpe bolingi komimona likolo na ngai mpe kosalela pasi na ngai mpo na kotiola ngai,

⁶wana boyeba ete Nzambe nde asali ngai mabe mpe azingeli ngai na monyama na Ye.

⁷Atako nagangi ete basali ngai mabe, nazali kozwa ata eyano moko te ; ata soki nabeleli ete basunga ngai, moto oyo akokata likambo azali te.

⁸Akangi nzela na ngai mpo ete nakoka koleka te, atondisi nzela na ngai nyonso na molili,

⁹alongoli ngai lokumu, mpe alongoli motole na moto na ngai,

¹⁰asasi-sasi ngai na bangambo nyonso kino nakomi pene ya kokufa, apikoli elikya na ngai ndenge bapikolaka nzete ;

¹¹kanda na Ye ezali kotumba ngai, mpe azali kotanga ngai na molongo ya banguna na Ye ;

¹²mampinga na Ye ezali kopusana na makasi penza, ezingeli ngai mpe ndako na ngai mpo na kosala ngai mabe.

¹³Akaboli ngai na bandeko na ngai, bongo bato oyo bayebi ngai bapesi ngai mokongo,

¹⁴balingami na ngai balimwe, mpe baninga na ngai babosani ngai ;

¹⁵bato oyo nayambaki na ndako na ngai mpe basali na ngai ya basi, bango nyonso bakomi kotala ngai lokola mopaya, bakomi komona ngai lokola moto oyo batikala koyeba te.

¹⁶Nazali kobenga mosali na ngai, kasi azali ata koyanola ngai te, atako monoko na ngai moko nde ezali kobondela ye.

¹⁷Solo ya monoko na ngai ekomi kokimisa ata mwasi na ngai, bongo bandeko na ngai moko penza bayini ngai.

¹⁸Ata bilenge mibali ya mike bakomi koseka ngai ; soki kaka nabimi, bakomi kosambwisa ngai.

¹⁹Balingami na ngai nyonso ya motema bayini ngai, bato oyo nazalaki kolinga babalukeli ngai ;

²⁰nakomi eloko pamba, natikali kaka poso ya nzoto mpe mikuwa, nazali kobika kaka na misuni ya minu na ngai.

²¹Balingami na ngai, boyokela ngai mawa, nabondeli bino penza, boyokela ngai mawa, pamba te loboko ya Nzambe ebeti ngai.

²²Mpo na nini bozali kolandela ngai boye, ndenge kaka Nzambe azali kolandela ngai ? Botondi mosuni na ngai te ?

²³Ah, soki ata maloba na ngai ekomamaki, soki ekomamaki na buku !

²⁴Elingaki kokomama na ekomeli ya ebende, ya ebende oyo ya songe penza, mpo na kotobola makomi yango na mabanga mpo ete etikala wana mpo na libela.

²⁵Ngai, nayebi na ngai malamu ete Mosikoli na ngai azali na bomoi, mpe, awa na mokili, akotelema ya suka mpo na kokata likambo na ngai.

²⁶Sima na kobebisama ya poso ya nzoto na ngai, ngai, na nzoto na ngai, nakomona Nzambe.

²⁷Solo, nakomona Ye, miso na ngai moko ekomona Ye, ngai moko penza, moto mosusu te.

²⁸Bino oyo bozali koloba : ‹ Tokolanda ye ndenge nini ? › Mpe bino bato oyo bomoni mabe kati na ngai,

²⁹bolenga bino moko liboso ya mopanga, pamba te mopanga ezali esalelo ya kanda mpo na masumu, mpe bokoyeba ete kosambisama ezali. »