Read Mokanda na Bomoi Yobo 21 Bible Online

Yobo 21 - Mokanda na Bomoi bible

Yobo 21

¹Yobo azongisaki :

²« Yoka na bokebi maloba na ngai, mpe tika ete yango ezala kobondisama mpo na ngai.

³Bokanga nanu mitema, wana nazali koloba ; soki nasilisi koloba nde bokoba na bino koseka ngai.

⁴Boni, nazali kolela epai ya moto ? Ndenge nini nalemba te kokanga motema ?

⁵Botala ngai, bokokamwa, bokozanga ata likambo ya koloba.

⁶Soki kaka nakanisi yango, nabangi, mpe nzoto na ngai ekomi kolenga na somo.

⁷Mpo na nini bato mabe bazali kowumela na bomoi ? Mpo na nini bakomaka mibange mpe babakisaka nguya na bango ?

⁸Bana na bango bazali kolendisama pembeni na bango, mpe bakitani na bango bazali kofuluka na miso na bango.

⁹Bandako na bango ebatelami mpe ezangi kobanga, fimbu na Nzambe ezali likolo na bango te.

¹⁰Bangombe na bango ya mibali elembaka te kobotisa, bangombe na bango ya basi ebotaka kaka mpe esopaka zemi te.

¹¹Lokola kati na etonga ya bameme, bazali kotika bana na bango : bamoko kokima-kima, mpe bamosusu kosakana.

¹²Bazali kobeta mbonda mpe lindanda, bazali kosepela na lokito ya flite ;

¹³bazali kolekisa mikolo na bango na bomengo, mpe bazali kokende na mboka ya bakufi na kimia.

¹⁴Nzokande, balobaka na Nzambe : ‹ Longwa mosika na biso ! Tozali na posa te ya koyeba nzela na yo.

¹⁵Nkolo-Na-Nguya-Nyonso nde nani mpo ete tosalela ye ? Tokozwa litomba nini na kosambela ye ? ›

¹⁶Boni, bozwi na bango ezali kati na maboko na bango moko te ? Kasi mosika na ngai, likanisi ya kolanda toli ya bato mabe !

¹⁷Mbala boni bazali koboma mwinda ya bato mabe ? Mbala boni pasi ezali kokitela bango ? Boni, Nzambe abombeli bango kanda na Ye ?

¹⁸Mokolo nini mopepe makasi ekomema bango lokola makasa to matiti ya kokawuka ?

¹⁹Balobaka : ‹ Nzambe apesaka etumbu ya moto mabe epai ya bana na ye. › Tika ete apesa etumbu yango epai na ye moko moto mabe, mpo ete ayeba yango !

²⁰Tika ete miso na ye moko emona kobebisama na ye, mpe amela kopo ya kanda ya Nkolo-Na-Nguya-Nyonso.

²¹Pasi ya libota oyo etikali sima na ye ekosala ye nini tango basanza oyo bakatela ye ekomi na suka ?

²²Bakoki solo koyekolisa Nzambe mayele, Ye oyo asambisaka ezala bato oyo baleki kotombolama ?

²³Moko azali kokufa na makasi na ye nyonso, na kimia nyonso mpe na pasi ata moko te,

²⁴na nzoto sembesembe, mpe na mikuwa etonda na mafuta ;

²⁵mosusu azali kokufa na mawa na motema, atikali ata komeka kosepela na bomengo te.

²⁶Nzokande, bango mibale bakolala ndenge moko na se ya mabele, mpe bankusu ekozipa bango.

²⁷Solo, nayebi malamu makanisi mpe mabongisi na bino, mpo na kotelemela ngai ;

²⁸bolobaka : ‹ Wapi ndako ya mozwi ? Wapi bandako oyo bato mabe bazalaki kovanda ? ›

²⁹Botunaki mituna wana te epai ya baleki nzela ? Bobosani makambo oyo bayebisaki bino,

³⁰ete moto mabe abikaka mpe na mokolo ya pasi, akangolamaka mpe na mokolo ya kanda.

³¹Nani, na miso ya moto mabe, apamelaka etamboli na ye ? Nani azongiselaka ye makambo oyo asalaka ?

³²Bamemaka ye na lilita, mpe bakengelaka kunda na ye.

³³Mabele ya lubwaku ezalaka malamu mpo na ye ; bato nyonso batambolaka sima na ye na molongo, mpe bato ebele penza batambolaka liboso na ye.

³⁴Boye, mpo na nini bozali komitungisa mpo na kobondisa ngai ? Pamba te kati na biyano na bino, etikali kaka lokuta. »