Read Mokanda na Bomoi Yobo 22 Bible Online

Yobo 22 - Mokanda na Bomoi bible

Yobo 22

¹Elifazi, moto ya Temani, azwaki maloba mpe alobaki :

²« Boni, litomba nini Nzambe akoki kozwa epai ya moto ? Ezala ata moto ya bwanya, azalaka na litomba kaka mpo na ye moko.

³Ezala soki ozali moyengebene, litomba nini Nkolo-Na-Nguya-Nyonso akoki kozwa, ata ozali kobongisa nzela na yo ya bosembo ?

⁴Boni, okanisi ete ezali mpo na boyengebene na yo nde azali kopamela yo mpe kosambisa yo ?

⁵Mabe na yo ezali monene te ? Masumu na yo eleki ndelo te ?

⁶Ozalaki koluka na pamba ndanga epai ya bandeko na yo ya mibali, ozalaki kolongola bato bilamba mpe kotika bango bolumbu,

⁷ozalaki kopesa mayi te na moto oyo azalaki na posa ya mayi, mpe ozalaki kopimela moto oyo azalaki na nzala bilei,

⁸atako ozalaki moto monene, nkolo mabele, mpe ozalaki kovanda na mabele yango lokola moto ya lokumu ;

⁹ozalaki kozongisa basi bakufisa mibali maboko pamba, mpe ozalaki kosilisa makasi ya bana bitike.

¹⁰Yango wana, mitambo ezingeli yo, kobebisama ya mbalakata ekomi kopesa yo somo,

¹¹molili makasi ezwi yo mpe ozali kokoka komona te, mpe mpela ezipi yo.

¹²Boni, Nzambe azali te kuna na likolo, kati na Lola ? Tala ndenge nini etando ya minzoto ezali likolo koleka !

¹³Nzokande, ozali koloba : ‹ Nzambe ayebi nini ? Akoki kosambisa kati na mapata ya molili ya boye ? ›

¹⁴Mapata minene ezipi Ye, yango wana azali komona biso te, wana azali kotambola-tambola na etando ya Lola ?

¹⁵Olingi solo kotikala kaka na nzela ya kala, nzela oyo bato mabe balekelaki ?

¹⁶Kufa ememaki bango na mbalakata, mpe miboko na bango etiolaki na mpela.

¹⁷Bazalaki koloba na Nzambe : ‹ Tika biso, biso moko ! Nkolo-Na-Nguya-Nyonso akosala biso nini ? ›

¹⁸Nzokande, Ye nde atondisaki bandako na bango na biloko ya kitoko. Yango wana, ngai, naboyaka toli ya bato mabe.

¹⁹Bato ya sembo bazali komona kobebisama na bango mpe bazali kosepela, bayengebene bazali koseka bango mpe bazali koloba :

²⁰‹ Solo, banguna na biso babebi, moto ezikisi bomengo na bango. ›

²¹Zongisa boyokani na yo elongo na Ye mpe luka kimia. Na nzela wana, bomengo ekoya lisusu epai na yo.

²²Ndima malako oyo ekowuta na monoko na Ye, mpe batela maloba na Ye kati na motema na yo.

²³Soki ozongi epai na Nkolo-Na-Nguya-Nyonso, soki obengani mabe mosika ya ndako na yo, bomengo na yo ekozongela yo.

²⁴Bwaka wolo na yo kati na putulu, wolo na yo ya Ofiri kati na mabanga ya lubwaku ;

²⁵bongo Nkolo-Na-Nguya-Nyonso akozala wolo na yo, mpe palata oyo eleki kitoko mpo na yo.

²⁶Solo, okozwa esengo epai ya Nkolo-Na-Nguya-Nyonso mpe okotombola elongi na yo epai ya Nzambe.

²⁷Okosambela Ye, Ye akoyoka yo, mpe okokokisa ndayi na yo.

²⁸Makambo oyo okokana, ekosalema, mpe pole ekongenga na nzela na yo.

²⁹Soki bato balembi, mpe yo olobi : ‹ Telema ! › Nzambe akobikisa bango,

³⁰akokangola ata moto oyo asali mabe, akokangola ye penza mpo na bopeto ya maboko na yo. »