Read Mokanda na Bomoi Yobo 24 Bible Online

Yobo 24 - Mokanda na Bomoi bible

Yobo 24

¹Mpo na nini Nkolo-Na-Nguya-Nyonso akataka tango te mpo na esambiselo ? Mpo na nini bato oyo bayebi Ye basengeli koluka na pamba mikolo ya boye ?

²Bato bapusaka bandelo, bakendaka koleisa bibwele oyo bayibaki,

³babotolaka ane ya mwana etike mpe bazwaka lokola ndanga ngombe ya mobali ya mwasi oyo akufisi mobali ;

⁴balongolaka babola na nzela, mpe batindaka na makasi babola nyonso ya mokili ete babombama.

⁵Lokola ba-ane ya zamba, babola bakendaka tongo-tongo na mosala mpo na koluka biloko ya kolia, kasi kaka esobe nde epesaka bana na bango bilei ;

⁶bakataka matiti na bilanga mpo na bibwele mpe balokotaka bambuma oyo etikalaka na bilanga ya vino ya moto mabe.

⁷Na butu, balalaka bolumbu mpo na kozanga bilamba, bazangi bulangeti mpo na komifinika na tango ya malili ;

⁸bapoli na mvula ya ngomba, bakangami na mabanga mpo na kozanga esika ya kobombama.

⁹Bazali kobotola mwana etike na mabele ya mama na ye, bazali kokanga mwana ya mobola mpo na niongo.

¹⁰Soki bazangi bilamba, batambolaka bolumbu ; bamemaka maboke ya nzete ya ble, kasi bazongaka kaka na nzala.

¹¹Bakamolaka bambuma ya olive kati na mapango ya bato mosusu, bakamolaka bambuma ya vino, kasi bazongaka kaka na posa ya komela.

¹²Bileli ya kufa ezali koyokana wuta na mboka, mpe milimo ya bato oyo bazoki ezali koganga mpo na koluka lisungi, kasi Nzambe azali kopesa etumbu ata na moto moko te.

¹³Bato oyo bazali kosala bongo, bazali kotombokela pole, bayebi nzela na Ye te mpe batambolaka ata kati na yango te.

¹⁴Mobomi azali kotelema na moyi mpe koboma mobola elongo na moto akelela ; na butu, azali lokola moyibi.

¹⁵Liso ya moto ya ekobo ezelaka ete molili ekota ; amilobelaka : ‹ Moto moko te akomona ngai, › mpe abombaka elongi na ye.

¹⁶Kati na molili, bato balukaka kobuka bandako ya bato ; kasi na moyi, bamikangelaka na ndako, bazali koboya pole.

¹⁷Mpo na bango, molili makasi ezali nde tongo, somo ya molili ekomaka moninga na bango.

¹⁸Nzokande bazali lokola fulufulu likolo ya etando ya mayi, eteni ya mabele na bango elakelami mabe epai ya bato ya mboka, yango wana moko te azali kokende na bilanga ya vino.

¹⁹Ndenge kokawuka mpe moyi makasi emelaka mayi ya mvula pembe, ndenge wana mpe mboka ya bakufi emelaka bato oyo basalaka masumu.

²⁰Libumu ya mama ebosanaka bango mpe bankusu esepelaka kolia bango. Bakanisaka bango lisusu te, pamba te mabe na bango esili kobukana lokola nzete.

²¹Bato mabe basepelisaka basi bazangi bana mpe bato oyo babotaka te, kasi basalaka bolamu te epai ya mwasi oyo akufisa mobali.

²²Kasi Nzambe, na nguya na Ye, abakisaka mikolo ya banyokoli na bango ; ata batombolami, bazalaka na elikya te mpo na bomoi na bango.

²³Nzambe apesaka bango kimia, kasi miso na Ye etalaka nzela na bango.

²⁴Mpe atako sik’oyo bazali bato minene, na tango moke bakozala lisusu te, bakokweya mpe bakokufa lokola moto nyonso, bakokatama lokola mito ya ble.

²⁵Soki ezali bongo te, nani akoki kolakisa ngai ete nazali koloba lokuta ? Nani akoloba ete maloba na ngai ezali ya pamba ? »