Read Mokanda na Bomoi Yobo 26 Bible Online

Yobo 26 - Mokanda na Bomoi bible

Yobo 26

¹Yobo azongisaki :

²« Ah ! Tala ndenge osungi moto oyo azangi makasi, ndenge osungi loboko oyo elembi !

³Tala toli oyo opesi na moto azangi bwanya, mpe tala ebele na mayele oyo olakisi !

⁴Ozwi maloba oyo wapi ? Molimo oyo elobi na monoko na yo ezali ya nani ?

⁵Bakufi balengaka na se ya mayi mpe ya bikelamu oyo ezalaka kuna.

⁶Liboso ya Nzambe, mboka ya bakufi ezali bolumbu, mpe libulu ya molili ezali polele.

⁷Atandaka likolo na esika oyo ezali na eloko moko te, atelemisaka mabele na likolo ya eloko moko te,

⁸akangaka mayi kati na mapata, kasi mapata epasukaka te ;

⁹azipaka kiti ya bokonzi na Ye, atandaka mapata na likolo na yango ;

¹⁰akataka mondelo na likolo ya mayi, na suka ya pole mpe na molili.

¹¹Makonzi ya Lola ezali kolenga mpe ezali kokamwa na pamela na Ye.

¹²Na nguya na Ye, apasoli ebale monene ; mpe na mayele na Ye, abuki-buki Rakabe na biteni.

¹³Na pema na Ye, Likolo ekomaka kitoko, loboko na Ye etobolaka nyoka oyo ekimaka.

¹⁴Soki makambo wana ezali kaka ndambo moke ya misala na Ye mpe mongongo na Ye ya se oyo toyokaka, nani akoki kososola bakake ya nguya na Ye ? »