Read Mokanda na Bomoi Yobo 27 Bible Online

Yobo 27 - Mokanda na Bomoi bible

Yobo 27

¹Yobo akobaki koloba :

²« Na Kombo ya Nzambe oyo awangani bosembo na ngai, na Kombo ya Nkolo-Na-Nguya-Nyonso oyo atungisi motema na ngai,

³wana ngai nazali nanu na bomoi, mpe pema ya Nzambe ezali nanu na zolo na ngai,

⁴bibebu na ngai ekoloba mabe te, mpe lolemo na ngai ekobimisa lokuta te.

⁵Ekozala penza mabe koleka soki ngai nalongisi bino ! Kino tango nakokufa, nakotika te kotatola boyengebene na ngai,

⁶nakobatela bosembo na ngai, nakotika yango te ; motema na ngai ekotikala kosambisa ngai mokolo moko te.

⁷Tika ete bayini na ngai bazala lokola bato mabe, mpe banguna na ngai, lokola bato bazangi bosembo !

⁸Elikya nini moto mabe azali na yango tango Nzambe azwi bomoi na ye ?

⁹Boni, Nzambe ayokaki koganga na ye tango pasi ekomelaki ye ?

¹⁰Boni, akosepela penza na Nkolo-Na-Nguya-Nyonso to akobelela lisusu Nzambe tango nyonso ?

¹¹Nakoteya bino makambo oyo etali nguya ya Nzambe, nakobomba te nzela ya Nkolo-Na-Nguya-Nyonso.

¹²Bino nyonso, boyebi yango malamu ! Bongo mpo na nini bilobaloba ya boye ?

¹³Tala lifuti oyo Nzambe abongiseli moto mabe, libula oyo moto ya mobulu azwaka epai ya Nkolo-Na-Nguya-Nyonso :

¹⁴Ata soki bana na ye ya mibali bakomi ebele, mopanga ezali lifuti na bango, bakitani na ye bakokufa na nzala,

¹⁵bokono oyo ebomaka ekoboma bato na ye, oyo bakotikala na bomoi, mpe basi na bango oyo bakufisa mibali bakolela bango te.

¹⁶Ata soki asangisi palata lokola putulu mpe bilamba lokola mipiku ya mabele,

¹⁷nyonso oyo abongisi, moto ya sembo nde akolata yango, mpe bato oyo basali mabe te nde bakokabola palata na ye.

¹⁸Ndako oyo atongi ezali makasi te lokola ndako ya limpulututu, lokola ndako ya matiti oyo mokengeli atongaka.

¹⁹Akokufa na bozwi, kasi akosala na yango eloko moko te ; tango akofungola miso, bozwi na ye nyonso ekozala lisusu te.

²⁰Somo ekozwa ye lokola mayi ya mpela ; na butu, mopepe makasi ekopikola ye na mbalakata.

²¹Wuta na ngambo ya este, mopepe makasi ekomema ye, mpe akei libela, ekopikola ye na esika na ye.

²²Bakobwakela ye makonga na mawa te, ata azali kosala makasi ya kokima loboko ya moto oyo azali kobwakela ye yango.

²³Bakobetela libebi na ye maboko, mpe bakotiola ye na piololo wuta na ndako na ye moko. »