Read Mokanda na Bomoi Yobo 28 Bible Online

Yobo 28 - Mokanda na Bomoi bible

Yobo 28

¹Ezali na esika oyo batimolaka palata, mpe na esika oyo bapetolaka wolo.

²Ebende ewutaka na mabele, mpe libanga oyo balekisaka na moto epesaka motako.

³Moto asilisaka molili, alukaka kino na se, na bisika ya se penza, libanga kati na molili oyo eleki makasi,

⁴atimolaka libulu mosika ya esika oyo bato bavandaka, na bisika oyo makolo ya bato ekomaka te, mosika penza na bato, adiembelaka mosika ya bato nyonso.

⁵Mabele epai wapi bilei ewutaka ebongwani na se na yango lokola nde moto ezikisi yango.

⁶Mabanga ya safiri ewutaka na mabanga makasi ya mabele, mpe putulu ya wolo ezalaka kati na mabele.

⁷Ndeke moko te oyo eliaka misuni eyebi nzela na yango, miso ya mpongo moko te emoni yango,

⁸nyama ya zamba etia nanu makolo na yango kuna te, mpe nkosi etambola nanu kuna te.

⁹Moto abetaka loboko na ye na likolo ya libanga ya makasi mpe apikolaka ngomba longwa na misisa,

¹⁰atimolaka nzela kati na mabanga, mpe miso na ye emonaka bomengo na yango nyonso,

¹¹akawusaka mayi ya bibale mpe abimisaka na pole biloko oyo ebombama.

¹²Kasi bakoki komona bwanya wapi ? Mayele evandaka wapi ?

¹³Moto ayebaka motuya na yango te, pamba te bakoki komona yango te kati na mokili ya bato ya bomoi.

¹⁴Libulu ya mozindo elobi : « Ezali kati na ngai te ; » mpe ebale monene elobi : « Ezali epai na ngai te. »

¹⁵Bakoki kosomba yango te na motuya ya libanga ya wolo to na bakilo ya palata ;

¹⁶bakoki te kosomba yango na wolo ya Ofiri to na mabanga ya talo ya Onikisi to mabanga ya talo ya Safiri ;

¹⁷wolo to diama ekoki te kokokana na yango, bakoki kozwa yango te na motuya ya sani ya wolo ya kitoko.

¹⁸Mayaka ya Karayi mpe ya Jasipe ezali na motuya te liboso na yango. Motuya ya bwanya eleki pawuni ya talo.

¹⁹Topaze ya Kushi ekoki kokokana na yango te, mpe bakoki te kosomba yango ata na wolo ya peto.

²⁰Boye, bwanya ewutaka wapi ? Mayele evandaka wapi ?

²¹Ebombami mosika na miso ya bato nyonso ya bomoi, ebombami mpe mosika na miso ya bandeke ya likolo.

²²Libebi mpe kufa elobi : « Kaka sango na yango nde ekomaki na matoyi na biso. »

²³Nzambe kaka nde ayebi nzela na yango, Ye nde kaka ayebi esika bwanya evandaka.

²⁴Pamba te miso na Ye emonaka kino na suka ya mokili, mpe amonaka nyonso oyo ezali na se ya Lola.

²⁵Tango apesaki makasi na mopepe mpe atiaki mondelo na mayi,

²⁶tango atiaki mobeko mpo na mvula mpe afungolaki nzela mpo na kake mpe mikalikali,

²⁷amonaki bwanya mpe akumisaki yango, andimaki yango mpe amekaki yango.

²⁸Bongo alobaki na moto : « Kotosa Nkolo, yango nde bwanya ! Koboya mabe, yango nde mayele ! »