Read Mokanda na Bomoi Yobo 29 Bible Online

Yobo 29 - Mokanda na Bomoi bible

Yobo 29

¹Yobo akobaki koloba :

²« Ah ! Soki nakokaki kozala lisusu ndenge nazalaki na basanza oyo eleki, ndenge nazalaki na mikolo oyo Nzambe azalaki kobatela ngai,

³tango mwinda na Ye ezalaki kongenga na moto na ngai, mpe tango, na pole na Ye, nazalaki kotambola kati na molili.

⁴Ah ! Soki nakokaki kozala lisusu ndenge nazalaki na mikolo oyo nazalaki nanu na makasi, tango bolingo ya Nzambe ezalaki kopambola ndako na ngai,

⁵tango Nkolo-Na-Nguya-Nyonso azalaki nanu elongo na ngai bana mibali na ngai bazingelaki ngai,

⁶tango nzela na ngai etondisamaki na miliki mpe libanga ezalaki kosopa mafuta ya olive mpo na ngai !

⁷Tango nazalaki kokende na ekuke ya mboka mpe nazalaki kotia kiti na ngai na esika oyo bato ebele bakutanaka,

⁸bilenge bazalaki komona ngai mpe bazalaki kobombama, mibange bazalaki kotelema,

⁹bakambi bazalaki kozanga maloba mpe kozipa minoko na bango na maboko,

¹⁰bato ya lokumu bazalaki kokitisa mingongo na bango mpe lolemo na bango ezalaki kokangama na minoko na bango.

¹¹Moto nyonso oyo azalaki koyoka ngai azalaki koloba ete nazali moto ya esengo, mpe bato nyonso oyo bazalaki komona ngai bazalaki kotatola mpo na ngai ;

¹²pamba te nazalaki kosunga babola oyo bazalaki kosenga lisungi, mpe mwana etike oyo azangi moto oyo akosunga ye.

¹³Moto oyo akomaki pene ya kokufa azalaki kopambola ngai, mpe nazalaki kopesa esengo na motema ya mwasi oyo akufisa mobali.

¹⁴Nazalaki kolata bosembo lokola elamba ; bosembo ezalaki elamba na ngai mpe kitendi na ngai ya kokanga na moto.

¹⁵Nazalaki miso ya mokufi miso mpe makolo ya mokakatani ;

¹⁶nazalaki tata ya moto oyo akelela, nazalaki kobundela moto oyo nayebi te ;

¹⁷nabukaki mbanga ya moto mabe mpe nabotolaki bato oyo akangaki na minu na ye.

¹⁸Nazalaki kokanisa : ‹ Nakokufa kati na ndako na ngai moko sima na mikolo ebele lokola zelo.

¹⁹Misisa na ngai ekoluka mayi, mpe mayi oyo ezalaka na matiti ekovanda butu mobimba na bitape na ngai.

²⁰Lokumu na ngai ekozongisela ngai esengo, ata tolotolo ekokoma ya sika na loboko na ngai. ›

²¹Bato bazalaki koyoka ngai na bokebi, bazalaki na kimia mpo na koyoka toli na ngai.

²²Sima na ngai koloba, bazalaki na liloba ya kozongisa te ; maloba na ngai ezalaki kokota na esengo na matoyi na bango.

²³Bazalaki kozela ngai ndenge bazelaka mvula, mpe bazalaki komela maloba na ngai lokola mvula ya suka.

²⁴Soki nasekisi bango, bazalaki kondima te ; kongenga ya elongi na ngai ezalaki na motuya mpo na bango.

²⁵Naponaki nzela mpo na bango mpe navandaki lokola mokonzi na bango ; nazalaki kokonza bango lokola mokonzi kati na mampinga na ye, nazalaki lokola moto oyo azalaki kolendisa bato ya mawa. »