Read Mokanda na Bomoi Yobo 30 Bible Online

Yobo 30 - Mokanda na Bomoi bible

Yobo 30

¹« Kasi sik’oyo, nakomi eloko ya kotiola epai ya bilenge oyo batata na bango bazangaki tina, mpe oyo nakokaki kutu te kopesa nzela ya kolia esika moko na mbwa na ngai, oyo ezalaki kobatela bibwele na ngai.

²Makasi ya maboko na bango ekokaki kutu kosunga ngai na nini ? Pamba te basilaki makasi na nzoto,

³bazalaki bato bakawuka na nzala mpe na kozanga, bato oyo bazalaki kolia mabele ya esobe mpe ezanga matiti.

⁴Bazalaki kobuka matiti ya mungwa kati na banzete mpe kolia misisa ya banzete mike.

⁵Babenganaki bango kati na bato na bango, babelelaki bango lokola miyibi.

⁶Bazalaki kovanda na nzela ya mayi ekawuka, kati na mabulu ya mabele mpe ya mabanga ;

⁷bazalaki kolela lokola banyama kati na banzete mike ya nzube, bazalaki kosangana na se ya banzete mikuse.

⁸Bana oyo batata na bango bazanga mayele mpe bazanga kombo babenganaki bango libanda ya mboka.

⁹Sik’oyo, bana na bango ya mibali bakomi koseka ngai na banzembo, nakomi lisapo kati na minoko na bango.

¹⁰Bazali koyina ngai mpe bakimi mosika na ngai, bazali na somo te ya kobwakela ngai soyi na elongi.

¹¹Mpo ete Nzambe alembisi singa ya tolotolo na ngai mpe ayokisi ngai soni, bazali komipekisa na likambo moko te liboso na ngai.

¹²Na loboko na ngai ya mobali, lisanga ya bato mabe ezali kobundisa ngai, batie mitambo na makolo na ngai, batie mabaku na nzela na ngai mpo na kosala ngai mabe ;

¹³bakangi nzela na ngai, balongi kobebisa ngai atako moto moko te asungaki bango.

¹⁴Bazali koya lokola na nzela ya lidusu ya monene, bazali kobunda-bunda kati na ndako ebukana.

¹⁵Somo elati ngai, lokumu na ngai ekeyi lokola mopepe, bomengo na ngai elimwe lokola lipata.

¹⁶Sik’oyo, bomoi na ngai ekeyi, mpe mikolo ya pasi ekangi ngai.

¹⁷Butu ezali kotobola mikuwa na ngai mpe pasi ezali kozangisa ngai pongi.

¹⁸Na nguya na yango, pasi ekomi lokola kingo ya nzambala na ngai.

¹⁹Nzambe abwaki ngai na potopoto, mpe nakomi lokola putulu ya mabele to ya moto.

²⁰Oh Nzambe, nazali koganga epai na Yo, kasi ozali kopesa ngai eyano te ; natelemi, kasi ozali kotala ngai kaka pamba.

²¹Obongwani monguna ya kanza mpo na ngai, ozali kobundisa ngai na nguya ya loboko na Yo.

²²Omemi ngai liboso ya mopepe mpe otiki ete mopepe yango emema ngai, bongo epumbwisi ngai mosika.

²³Nayebi ete ozali komema ngai na kufa, na esika oyo obongisa mpo na bato ya bomoi.

²⁴Kasi boni, moto oyo azali kokufa akoki kotombola ata loboko te ? Moto oyo azali na pasi, akoki te kosenga lisungi ?

²⁵Boni, nazalaki kolela te elongo na bato oyo bazalaki na pasi ? Motema na ngai eyokelaki babola mawa te ?

²⁶Nazelaki esengo, kasi pasi nde ekomeli ngai ; nazelaki pole, kasi molili nde ekomeli ngai.

²⁷Motema na ngai ezali kobaluka kati na ngai, wuta mokolo pasi oyo ekomeli ngai.

²⁸Nakomi mwindo, kasi moyi te nde eyindisi ngai ; kati na lisanga, nakomi kaka kotelema mpe kobelela mpo na koluka lisungi.

²⁹Nakoma ndeko ya mbwa ya zamba mpe moninga ya maligbanga.

³⁰Poso na ngai ya nzoto eyindi mpe ekomi kokweya-kweya, mikuwa na ngai ekawuki na moyi.

³¹Lindanda na ngai etikali kaka mpo na matanga, mpe flite na ngai, mpo na kosunga mingongo ya baleli. »