Read Mokanda na Bomoi Yobo 31 Bible Online

Yobo 31 - Mokanda na Bomoi bible

Yobo 31

¹« Nasalaki boyokani elongo na miso na ngai ete nalula elenge mwasi te.

²Pamba te, libula nini Nzambe akoki kobongisela ngai wuta na likolo ? Libonza nini Nkolo-Na-Nguya-Nyonso akoki kotindela ngai wuta na likolo ?

³Boni, pasi ezali mpo na bato mabe te ? Kobebisama ezali mpo na bato oyo basalaka masumu te ?

⁴Amoni banzela na ngai te ? Atangi matambe na ngai nyonso te ?

⁵Soki natambolaki na lokuta to litambe na ngai elandaki nzela mabe,

⁶tika ete Nzambe ameka ngai na emekelo ya sembo, mpe akomona ete ngai nasali mabe te.

⁷Soki matambe na ngai ebimaki na nzela na Ye, soki motema na ngai etambolisamaki kolanda miso na ngai, soki maboko na ngai ekomaki mbindo,

⁸tika ete bato mosusu balia biloko oyo ngai naloni, mpe tika ete nkona na ngai epikolama !

⁹Soki motema na ngai ekosamaki na mwasi to soki natalaki na makanisi mabe ekuke ya mozalani na ngai,

¹⁰tika ete mwasi na ngai atutela moto mosusu ble mpe tika ete mibali mosusu basangisa na ye nzoto.

¹¹Pamba te elingaki kozala likambo ya soni, mpe lisumu ya boye ebongi na esambiselo ya basambisi.

¹²Ezali moto oyo ezali kozikisa kino na kobebisama mpe ekoki kobebisa bomengo na ngai nyonso.

¹³Soki nasalelaki na bosembo te bawumbu na ngai ya mibali mpe ya basi tango bazwaki ngai mabe,

¹⁴nakosala nini soki Nzambe asambisi ngai ? Nakopesa eyano nini tango akotuna ngai ndenge nini nabandaki kosala ?

¹⁵Ezalaki Ye te oyo asalaki ngai kati na libumu ya mama na ngai nde asalaki bango ? Ngai na bango, tozalaki lolenge moko te kati na mabumu ya bamama na biso ?

¹⁶Soki nakokisaki te posa ya mobola to soki nalembisaki miso ya mwasi oyo akufisa mobali,

¹⁷soki nabombaki lipa na ngai mpo na ngai moko to nakabolaki yango te na bana bitike,

¹⁸—nzokande wuta bolenge na ngai, nazalaki kobokola bana bitike lokola tata na bango ; mpe wuta mbotama na ngai, nazalaki kolakisa nzela na mwasi oyo akufisa mobali—

¹⁹soki namonaki mobola kokufa na kozanga bilamba to moto akelela kozanga bilamba,

²⁰bongo motema na ye epambolaki ngai te na ndenge nazipaki ye na bilamba oyo ewutaki na bibwele na ngai,

²¹soki natombolaki loboko na ngai mpo na kosala mwana etike mabe, wana nayebaki ete nazali na nguya liboso ya basambisi,

²²tika ete loboko na ngai elongwa na lipeka na ngai to ebukana !

²³Pamba te nazalaki kobanga etumbu ya Nzambe, mpe nakokaki te kosala eloko liboso ya lokumu na Ye.

²⁴Soki natiaki elikya na ngai na wolo to nalobaki na wolo ya kitoko : ‹ Ozali ekimelo na ngai, ›

²⁵soki nasepelaki na ebele ya bozwi na ngai, bomengo oyo maboko na ngai esalaki,

²⁶soki natalaki moyi na kongenga na yango to sanza kotambola na nkembo,

²⁷soki motema na ngai ekosamaki na nkuku, mpe maboko na ngai epesaki yango beze ya lokumu,

²⁸wana elingaki lisusu kozala mbeba oyo ebongi na esambiselo ya basambisi, pamba te nalingaki kowangana Nzambe oyo azali na Likolo.

²⁹Soki nasepelaki na pasi ya monguna na ngai to nagangaki na esengo na likama oyo ekomelaki ye,

³⁰soki napesaki nzela na monoko na ngai ete esala lisumu na kosenga kufa ya monguna na ngai na nzela ya maloba ya kolakela mabe;

³¹soki bato ya libota na ngai balobaka te : ‹ Nani oyo atondaki te na misuni ya banyama ya Yobo ? ›

³²Soki mopaya moko te alalaki libanda, pamba te ekuke na ngai ezalaki ya kofungwama tango nyonso mpo na moleki nzela,

³³soki nabombaki lisumu na ngai ndenge Adamu asalaki to nabombaki yango na motema na ngai,

³⁴pamba te nabangaki bato mpe nabangaki ete mabota etiola ngai, yango wana nakangaki monoko mpe nakokaki kobima libanda te !

³⁵Ah, soki nazalaki ata na moto oyo akokaki koyoka ngai ! Yango nde sik’oyo liloba na ngai ya suka. Tika ete Nkolo-Na-Nguya-Nyonso ayanola ngai ! Tika ete moto oyo afundi ngai akoma na mokanda makambo oyo afundeli ngai !

³⁶Solo, nalingaki komema yango na lipeka na ngai, nalingaki kolata yango lokola motole,

³⁷nalingaki kotalisa Ye makambo nyonso oyo nasalaki, nalingaki kopusana pene na Ye lokola mokambi.—

³⁸Soki mabele na ngai eboyi ngai, soki mikala na yango elelaki,

³⁹soki naliaki bambuma na yango na ofele to soki natungisaki bankolo na yango,

⁴⁰tika ete banzube ebima na esika ya ble, mpe matiti mabe ebima na esika ya orje. » Oyo nde suka ya maloba ya Yobo.