Read Mokanda na Bomoi Yobo 32 Bible Online

Yobo 32 - Mokanda na Bomoi bible

Yobo 32

¹Bato wana misato batikaki koyanola Yobo, pamba te azalaki komimona sembo na miso na ye moko.

²Kasi Eliwu, mwana mobali ya Barakeyeli, moto ya libota ya Buzi mpe ya etuka ya Rami, asilikelaki Yobo makasi, pamba te amimonaki sembo koleka Nzambe.

³Asilikelaki mpe baninga misato ya Yobo, pamba te balongaki te kopesa Yobo eyano oyo esengeli ; nzokande bakweyisaki Nzambe.

⁴Eliwu awelaki te koloba moto ya liboso epai ya Yobo, pamba te baninga wana misato ya Yobo bazalaki mikolo na ye na mibu ya mbotama.

⁵Kasi tango Eliwu amonaki ete bato wana misato bazali lisusu na likambo ya koloba te, asilikaki makasi.

⁶Boye Eliwu, mwana mobali ya Barakeyeli, moto ya libota ya Buzi, alobaki : « Nazali leki na mibu ya mbotama, mpe bino bozali mikolo ; yango wana nazalaki kobanga mpe nazangaki makasi ya koloba na bino makambo oyo ngai nayebi.

⁷Nazalaki komilobela : ‹ Bato oyo bazali na mibu ebele ya mbotama bakoyeba koloba, pamba te kozala na mibu ebele epesaka bwanya. ›

⁸Nzokande, kati na moto, ezali nde molimo, ezali pema ya Nkolo-Na-Nguya-Nyonso nde epesaka moto boyebi.

⁹Ezali kaka mibange te nde bazali na bwanya, mpe ezali kaka bampaka te nde basosolaka makambo oyo ezali sembo.

¹⁰Yango wana nalobi : Boyoka ngai, ngai mpe nakoloba na bino makambo oyo nayebi.

¹¹Tango bino bozalaki koloba, ngai nazalaki koloba te, nazalaki koyoka makanisi na bino, wana bozalaki koluka makambo ya koloba.

¹²Nalandaki bino na bokebi nyonso ; moko te kati na bino amoni mabe ya Yobo, moko te kati na bino alongi makanisi ya Yobo.

¹³Boloba te : ‹ Tomoni bwanya ; Nzambe kaka nde akoki kolonga ye, kasi moto te. ›

¹⁴Lokola Yobo alobaki maloba na ye epai na ngai te, ngai mpe nakosalela makanisi na bino te mpo na kozongisela ye eyano.

¹⁵Bayoki soni, batikali ata na liloba moko te ya koloba, makambo ya koloba esili bango na minoko !

¹⁶Boni, nasengeli sik’oyo kozela, awa bazangi maloba to basuki wana mpe bakangi minoko ?

¹⁷Ngai mpe nakoloba sik’oyo, nakoloba makambo oyo nayebi.

¹⁸Lokola maloba ebele etondi kati na ngai, motema na ngai ezali kopela lokola moto.

¹⁹Kati na ngai, nazali lokola mbeki ya vino oyo ezali kotoka, lokola mbeki ya vino ya sika oyo ekomi pene ya kopasuka.

²⁰Nakoloba mpo ete motema na ngai ekita, nakofungola bibebu na ngai mpo ete nayanola.

²¹Nakopona bilongi te, nakobondela mpe moto moko te ;

²²pamba te, soki nayebaki kobondela bato, Mokeli na ngai alingaki kolongola ngai mbala moko.