Read Mokanda na Bomoi Yobo 33 Bible Online

Yobo 33 - Mokanda na Bomoi bible

Yobo 33

¹Kasi sik’oyo, Yobo, yoka maloba na ngai, tia matoyi mpo na koyoka maloba na ngai !

²Tala, nafungoli monoko na ngai, maloba na ngai ezali na songe ya lolemo.

³Maloba na ngai ewuti na motema ya sembo, bibebu na ngai ezali penza koloba makambo oyo ngai nayebi.

⁴Molimo ya Nzambe asalaki ngai, pema ya Nkolo-Na-Nguya-Nyonso epesi ngai bomoi.

⁵Boye soki okoki, yanola ngai, mibongisa mpo na komekana na ngai.

⁶Nazali kaka lokola yo liboso ya Nzambe ; ngai mpe nawutaki na putulu.

⁷Boye, somo na ngai ebangisa yo te, mpe monene ya loboko na ngai epanza yo te.

⁸Kasi olobaki na matoyi na ngai— mpe nazali nanu koyoka makelele ya maloba na yo—

⁹‹ Nazali sembo, nasali masumu te ; nazali peto, namemi na ngai ngambo te. ›

¹⁰Nzokande, Nzambe amoni mbeba kati na ngai, azali kozwa ngai lokola monguna na Ye.

¹¹Akangi makolo na ngai na bibende, azali kononga banzela na ngai nyonso.

¹²Kasi, kati na nyonso oyo, ngai nalobi, ozali na elonga te, pamba te Nzambe azali monene koleka moto.

¹³Mpo na nini ozali kosamba na Ye ? Alimbolaka tina ya misala na Ye epai ya moto moko te.

¹⁴Nzokande, Nzambe alobaka, na lolenge moko to na lolenge mosusu, kasi moto asosolaka yango te.

¹⁵Alobaka kati na ndoto, kati na emoniseli ya butu, tango bato bazwaka pongi makasi wana balali na mbeto ;

¹⁶boye, akoki kofungola matoyi ya bato mpe kobeta sete na makebisi oyo azali koloba,

¹⁷mpo na kotia moto mosika ya misala na ye ya mabe mpe kobatela ye na lolendo,

¹⁸mpo na kobatela molimo na ye mpo ete ekufa te, mpe bomoi na ye mpo ete ebebisama te na mopanga.

¹⁹Nzokande, moto akoki mpe, mbala mosusu, koteyama na mbeto na ye, na nzela ya kobela mpe ya minyoko ya tango nyonso kati na mikuwa na ye.

²⁰Boye, azali kosepela lisusu na lipa te, mpe motema na ye ekomi koboya bilei oyo alingaka mingi.

²¹Nzoto na ye ekawuki na pamba, mpe mikuwa na ye, oyo ebombama, ebimi.

²²Molimo na ye ezali kopusana pene ya kunda, mpe bomoi na ye, pene ya bamemi sango ya kufa.

²³Nzokande, soki ekoki kozala ata na anjelu moko, kati na ba-anjelu nkoto moko, mpo na koyebisa na moto makambo oyo ezali sembo,

²⁴tika ete asalela ye ngolu mpe aloba : ‹ Bikisa ye ete akota te kati na libulu ya kufa, nasili kofuta niongo mpo na kosikola ye, ›

²⁵nzoto na ye ekokoma lisusu sembesembe lokola na tango ya bolenge na ye, ekozonga ndenge ezalaki na bomwana na ye.

²⁶Akosambela Nzambe, akozwa ngolu na miso na Ye, akomona Nzambe na miso mpe akoganga na esengo. Nzambe akozwa ye lisusu lokola moto ya sembo.

²⁷Boye akoyemba na miso ya bato mpe akoloba : ‹ Nasalaki masumu mpe natambolaki na bosembo te, kasi nazwi lifuti oyo nasengelaki kozwa te.

²⁸Nzambe akangoli molimo na ngai na libulu ya kufa, mpe nakowumela kati na pole na esengo. ›

²⁹Nzambe asalaka makambo oyo nyonso epai ya moto mbala mibale to mpe mbala misato,

³⁰mpo na kolongola molimo na ye na libulu ya kufa, mpo ete pole ya bomoi ekoka kongenga likolo na ye.

³¹Yobo, fungola matoyi, vanda kimia mpe yoka ngai ! Nazali na makambo ya koloba na yo.

³²Kasi soki ozali na likambo ya koloba, yebisa ngai yango, pesa ngai eyano, mpe ngai nakolongisa yo.

³³Soki te, vanda kimia mpe yoka ngai, mpe ngai nakoteya yo bwanya. »