Read Mokanda na Bomoi Yobo 35 Bible Online

Yobo 35 - Mokanda na Bomoi bible

Yobo 35

¹Bongo Eliwu alobaki :

²« Boni, okanisi ete yango ezali sembo ? Olobi : ‹ Nazali sembo liboso ya Nzambe. ›

³Nzokande, ozali koloba : ‹ Nakozwa nini, litomba nini nakozwa soki nasali masumu te ? ›

⁴Nalingi kopesa yo eyano, yo elongo na baninga na yo.

⁵Tombola miso na likolo mpe tala ; mona ndenge mapata ezali likolo na yo.

⁶Soki osali masumu, ekosala Nzambe nini ? Soki masumu na yo ezali ebele, ekosala Ye nini ?

⁷Soki ozali sembo, okopesa Ye nini to akozwa nini na loboko na yo ?

⁸Mabe na yo ekokomela kaka bazalani na yo, bosembo na yo ezali na litomba kaka epai ya bana na bato.

⁹Bato bazali kolela na se ya mokumba ya minyoko, bazali koganga na se ya motema makasi ya bato minene.

¹⁰Kasi moto moko te azali koloba : ‹ Nzambe Mokeli na ngai, Ye oyo apesaka banzembo ya esengo na butu,

¹¹Ye oyo ateyaka biso koleka banyama ya mokili mpe akomisaka biso mayele koleka bandeke ya likolo, azali wapi ? ›

¹²Ata bagangi, Nzambe akoyanola te, mpo na lolendo ya bato mabe.

¹³Pamba te, Nzambe ayokaka te maloba na bango ya pamba, Nkolo-Na-Nguya-Nyonso azalaka ata na bokebi na yango te.

¹⁴Nzokande, yo ozali komeka koloba ete ozali komona Ye te, ete ozwi nanu eyano te na kolela na yo epai na Ye.

¹⁵Mpe sik’oyo, soki kanda ya Nzambe eyei nanu likolo na yo te mpe soki Ye azali nanu kobosana maloba na yo ya soni,

¹⁶elingi koloba ete yo, Yobo, ofungoli monoko na yo kaka na pamba mpe otondisi yango na maloba ya bozoba. »