Read Mokanda na Bomoi Yobo 36 Bible Online

Yobo 36 - Mokanda na Bomoi bible

Yobo 36

¹Eliwu abakisaki lisusu :

²« Yokela ngai nanu moke, nalingi koteya yo, nazali na makambo mingi mosusu ya koloba na tina na Nzambe.

³Tala, nazali kozwa mosika boyebi na ngai mpo na kobundela mpe kolongisa Mokeli na ngai.

⁴Yeba malamu ete maloba na ngai ezali ya lokuta te, ezali moto na boyebi ya solo nde azali pene na yo.

⁵Tala monene ya Nzambe ! Kasi atiolaka na Ye bato te, nguya na Ye emonanaka na nzela ya mikano na Ye ya makasi. Azali na nguya, mpe mikano na Ye ebongwanaka te.

⁶Atikaka moto mabe te kozala na bomoi, alongisaka banyokolami,

⁷alongolaka miso na Ye te likolo ya bayengebene, avandisaka bango na kiti ya bokonzi elongo na bakonzi mpe atombolaka bango mpo na libela.

⁸Kasi soki bato bakangami na minyololo to na basinga ya minyoko,

⁹atalisaka bango mabe oyo basali, mpe masumu oyo basalaka mpo na lolendo na bango.

¹⁰Afungolaka bango matoyi mpo na kokebisa bango mpe atindaka bango kotika mabe.

¹¹Soki batosi mpe basaleli Ye, bakolekisa mikolo na bango oyo etikali na bomengo, mpe mibu na bango na esengo.

¹²Kasi soki batosi Ye te, bakokufa na mopanga mpe bakosila mpo na kozanga boyebi.

¹³Bato oyo bayebi Nzambe te mpe mitema na bango etondisami na kanda, babelelaka Nzambe te tango akangaka bango minyololo.

¹⁴Bakufaka na bolenge, basukisaka bomoi na bango kati na mibali oyo bamipesaka na kindumba ya bule.

¹⁵Kasi bato oyo bazali konyokwama, akangolaka bango na nzela ya minyoko na bango, afungolaka bango matoyi na nzela ya pasi.

¹⁶Yo mpe, Nzambe alekisi yo na nzela ya nkaka mpe ya pasi mpo na kovandisa yo na esika ya pole, esika oyo ezangi mitungisi ; akotondisa mesa na yo na biloko ya kitoko.

¹⁷Kasi soki sik’oyo ozali kosala lokola moto mabe, etumbu mpe kosambisama ekokweyela yo.

¹⁸Tika ete elakeli mabe oyo etelemeli yo etinda yo te na kotomboka ! Boni, okoki kopesa kanyaka na bato ebele ? Kasi kopengwa te !

¹⁹Boni, bozwi na yo ezali solo na motuya mpo na kokangola yo ? Ezala mabanga na yo ya wolo to makasi na yo nyonso, boni, ekokoka solo kokangola yo ?

²⁰Kozala na posa te ya butu oyo elongolaka bato kati na bandako na bango.

²¹Mibatela ete okweya na mabe te, pamba te osepeli na mabe koleka minyoko.

²²Tala, Nzambe azali Mokonzi ya nguya na Ye, nani ateyaka koleka Ye ?

²³Nani akengelaka etamboli na Ye ? Nani akoki koloba na Ye : ‹ Ozali kosala mabe ? ›

²⁴Kanisa kokumisa misala na Ye, misala oyo bato bazali kokumisa na banzembo.

²⁵Bato nyonso bamonaka yango, batalaka yango na mosika.

²⁶Tala ndenge nini Nzambe azali monene ! Tososolaka yango te. Moto moko te akoki kotanga motango ya mibu na Ye.

²⁷Abendaka mayi epai na Ye, na mapata ; akomisaka yango mvula, mvula oyo enokaka mpe etondisaka bibale.

²⁸Mapata ekweyisaka yango, mpe enokisaka yango likolo na ebele ya bato.

²⁹Nani akoki kososola ndenge Nzambe apanzaka mapata mpe ndenge bakake ebimaka wuta na ndako na Ye ?

³⁰Tala ndenge abetisaka bakake likolo ya bato mpe atondisaka mozindo ya ebale monene.

³¹Na nzela ya biloko oyo nyonso, Nzambe asambisaka bikolo mpe apesaka bilei ebele.

³²Atondisaka maboko na Ye mibale na mikalikali, akotinda yango na esika oyo Ye aponi.

³³Makelele ya bakake epesaka sango ya koya na Ye, ata kutu bibwele esosolaka koya na Ye.