Read Mokanda na Bomoi Yobo 37 Bible Online

Yobo 37 - Mokanda na Bomoi bible

Yobo 37

¹Mpo na yango, motema na ngai ezali kolenga mpe ezali kobeta makasi lokola nde elingi kobima na esika na yango.

²Yoka ! Yoka makelele ya mongongo na Ye, makelele oyo ezali kobima na monoko na Ye.

³Azali kotinda yango na mokili mobimba, mpe kake na Ye kino na suka ya mokili.

⁴Sima na yango, konguluma na Ye ekoyokana, akoganga makasi na mongongo ya bokonzi na Ye ; akokanga mikalikali ya monoko na Ye te, wana mongongo na Ye ezali koyokana.

⁵Na nzela ya mongongo na Ye ya makasi, Nzambe asalaka bikamwa, asalaka makambo minene, makambo minene oyo mayele na biso ekoki kososola te.

⁶Alobaka na mvula ya pembe : ‹ Sopana na mabele. › Alobaka bongo lisusu na mvula ya makasi : ‹ Sopana. ›

⁷Boye, atiaka kashe na loboko ya moto nyonso mpo ete moto nyonso ayeba misala na Ye. Atondisaka bato nyonso na somo ya nguya na Ye.

⁸Banyama ezongaka na bandako na yango mpe evandaka kati na libulu na yango.

⁹Mopepe makasi ewutaka na ngambo ya sude, malili mpe mipepe, na ngambo ya nor.

¹⁰Na mopepe oyo ebimaka na monoko ya Nzambe, mayi ebongwanaka libanga mpe bitima ya mayi ekondaka.

¹¹Atondisaka mapata na mayi, mpe pole na Ye epanzaka mapata ya mvula.

¹²Na makasi na Ye, mapata ebalukaka na bangambo nyonso mpo na kokokisa nyonso oyo Ye atindaka yango kosala kati na mokili.

¹³Ezalaka mpo na kopesa etumbu na mokili to mpo na kopambola yango.

¹⁴Yoka, Yobo ! Telema mpe sosola bikamwa ya Nzambe.

¹⁵Oyebi ndenge nini Nzambe akambaka mapata, mpe ndenge nini angengisaka mikalikali na Ye na mapata ?

¹⁶Oyebi ndenge nini mapata evandaka malamu ? Ezali bikamwa ya Ye-Oyo-Akoka-Na-Boyebi-Nyonso.

¹⁷Bilamba na yo ezali na moto, nzokande mabele ezali konyokwama na mopepe ya midi.

¹⁸Boni, okoki solo kosunga Nzambe mpo na kotanda likolo elongo na Ye, likolo oyo ezali makasi lokola talatala ya ebende banyangwisa na moto ?

¹⁹Yebisa biso makambo oyo tosengeli koloba na Ye ; tokoki koloba likambo moko te mpo na molili na biso.

²⁰Boni, basengeli koyebisa Ye ete nalingi koloba ? Basengeli koyebisa Ye mpo ete ayeba yango ?

²¹Na pwasa, moto moko te azali komona lisusu pole ; ebombami kati na mapata. Kasi soki mopepe eleki, elongoli yango nyonso.

²²Kongenga lokola wolo ezali koya wuta na ngambo ya nor. Nzambe avandi kati na nkembo ya somo.

²³Azali Nkolo-Na-Nguya-Nyonso, tokoki te kokoma esika Ye azali ; azali monene na nguya mpe na solo ; azali Mokonzi ya sembo, akoki konyokola te moto oyo azali sembo.

²⁴Yango wana bato basengeli kokumisa Ye, kasi Ye atiaka miso na Ye te likolo ya bato oyo bakanisaka ete bazali bato ya bwanya. »