Read Mokanda na Bomoi Yobo 38 Bible Online

Yobo 38 - Mokanda na Bomoi bible

Yobo 38

¹Yawe ayanolaki Yobo kati na mopepe makasi :

²« Nani azali kobebisa mabongisi na ngai na maloba ezanga tina ?

³Lata mokaba na yo lokola elombe mobali ; nakotuna yo mituna mpe okoyanola ngai.

⁴Ozalaki wapi tango ngai nasalaki mabele ? Yebisa ngai soki ozali mayele.

⁵Nani akataki mondelo na yango, oyebi ye ? Nani amekaki molayi na yango na singa ?

⁶Makolo ya makonzi na yango evandi likolo ya nini ? Nani atiaki libanga na yango ya songe,

⁷tango minzoto ya tongo ezalaki koyemba elongo mpe tango bana na Nzambe bazalaki koganga na esengo ?

⁸Nani akangaki ebale monene na bikuke ya makasi tango yango ebimaki wuta na mabele,

⁹tango nakomisaki mapata elamba na yango, mpe molili, singa ya kokangela yango,

¹⁰tango natielaki yango bandelo, tango natielaki yango bikuke ya makasi,

¹¹tango nalobaki : ‹ Okosuka kino awa, kasi mosika te ; awa nde ekosukela mbonge ya lolendo na yo ? ›

¹²Boni, osili kopesa tongo mitindo to osili kolakisa tongo-tongo esika na yango,

¹³mpo ete esimba bandelo ya mokili mpe ebimisa bato mabe ?

¹⁴Mabele ebongwani lokola potopoto oyo batia kashe, mpe nyonso emonani lokola elatisami elamba.

¹⁵Bazangisi bato mabe pole mpe babuki loboko oyo etombwami mpo na kosala mabe.

¹⁶Osila kokoma kino na etima ya ebale monene ? Osila kotambola na se ya libulu ya molili ?

¹⁷Boni, basila kolakisa yo bikuke ya kufa ? Osila komona bikuke ya elilingi ya kufa ?

¹⁸Miso na yo esila komona kino na bitando monene ya mokili ? Loba yango soki oyebi makambo oyo nyonso.

¹⁹Wapi nzela oyo ememaka na pole ? Bongo molili ezalaka wapi

²⁰mpo ete omema yango na bisika na yango mpe oyeba banzela oyo ememaka na esika oyo evandaka ?

²¹Solo, oyebi yango malamu, pamba te osilaki kobotama mpe motuya ya mikolo na yo ezali ebele.

²²Boni, osila kokoma na esika oyo babombaka mvula ya pembe mpe na esika oyo babombaka mvula ya mabanga ?

²³Nabombaki yango mpo na tango ya pasi mpe mpo na mikolo ya bitumba.

²⁴Na nzela nini pole ebimaka mpe mopepe ya ngambo ya este epanzanaka ?

²⁵Nani atimola nzela mpo na mvula makasi, nani apasola nzela mpo na mokalikali ya bakake

²⁶mpo na konokisa mvula na esika oyo ezanga bato, na esika ya esobe oyo bato bavandaka te,

²⁷mpo na kosopa mayi na bisika oyo ezanga bato mpe ekawuka, mpe mpo na kobotisa matiti ya mobesu ?

²⁸Boni, mvula ezali nde na tata ? Nani abotaki matanga ya mamwe ?

²⁹Libumu ya nani ebotaki mayi ya libanga ? Nani abotaki londende oyo ewutaka na likolo ?

³⁰Tango nini mayi ekomaka libanga mpe likolo ya mayi ya mozindo ekomaka libanga ?

³¹Okoki kokanga na singa Minzoto sambo esika moko to kofungola basinga ya Minzoto minei ?

³²Okoki kobimisa bilembo ya Zodiake[3] na tango na yango mpe kokamba Ngombolo elongo na bana na yango ?

³³Oyebi mibeko ya likolo ? Okolonga kokokisa bokonzi na yango na mokili ?

³⁴Okoki kotombola mongongo na yo na mapata mpo ete mayi ebele ezipa yo ?

³⁵Okoki kotinda bakake ete ebima na banzela na yango mpe eloba na yo : ‹ Tala biso oyo ? ›

³⁶Nani atia bwanya na motema ya moto to nani apesa soso mayele ?

³⁷Nani azali na bwanya mpo na kotanga mapata mpe kosopa mayi ya nzungu ya likolo

³⁸mpo ete putulu etiola elongo lokola ebende oyo enyangolami na moto mpe mpo ete maboke ya mabele ekangama esika moko ?

³⁹Boni, yo nde okokoka koboma nyama mpo na nkosi ya mwasi mpe kosilisa nzala ya bana na yango

⁴⁰tango elalaka kati na mabulu na yango mpe emilengelaka na se ya banzete ya makasa ebele ?

⁴¹Nani abongiselaka yanganga bilei tango bana na yango egangaka epai ya Nzambe mpe tango eyengaka-yengaka mpo na kozanga bilei ?