Read Mokanda na Bomoi Yobo 40 Bible Online

Yobo 40 - Mokanda na Bomoi bible

Yobo 40

¹Yawe ayanolaki Yobo :

²« Boni, moto oyo atiaka tembe na Nkolo-Na-Nguya-Nyonso akoki koteya Ye ? Tika ete oyo azali koswanisa Nzambe ayanola Ye ! »

³Yobo azongiselaki Yawe :

⁴« Tala ngai, nazali se ekelamu ya pamba, eyano nini nakoki kopesa Yo ? Natie loboko na ngai na monoko.

⁵Nalobaki mbala moko, kasi nakoyanola lisusu te ; na mbala ya mibale, nakobakisa lisusu eloko te. »

⁶Yawe alobaki na Yobo wuta na mopepe makasi :

⁷« Kanga mokaba na loketo na yo lokola elombe mobali ; nakotuna yo mituna, mpe okoyanola ngai.

⁸Olingi kotiola bosembo na ngai ? Okani kokweyisa ngai mpo ete yo moko omilongisa ?

⁹Ozali na loboko lokola oyo ya Nzambe ? Mongongo na yo ekoki konguluma makasi lokola oyo ya Ye ?

¹⁰Lata nkembo mpe kongenga, milatisa lokumu mpe monene !

¹¹Sopa nguya ya kanda na yo likolo ya bato, tala bato nyonso ya lolendo liboso na yo mpe kitisa bango !

¹²Tala bato nyonso ya lolendo, yokisa bango soni ! Nyata-nyata bato mabe na esika oyo bazali.

¹³Kunda bango nyonso kati na putulu, zipa bilongi na bango na esika ya kobombama.

¹⁴Boye, ngai moko nakopesa yo lokumu, pamba te loboko na yo ya mobali ekoki mpo na kobikisa yo.

¹⁵Tala ngubu : nakelaki yango ndenge nakelaki yo, kasi eliaka kaka matiti lokola ngombe.

¹⁶Tala makasi oyo ezali kati na loketo na yango, nguya oyo ezali kati na misuni ya libumu na yango !

¹⁷Ekembisaka mokila na yango lokola nzete ya sedele ; misisa ya mipende na yango elingama-lingama ;

¹⁸mikuwa na yango ezali lokola bibende ya bronze ; mipanzi na yango ezali lokola biteni ya bibende.

¹⁹Ezali ekelamu ya liboso ya Nzambe, kasi Mokeli na yango atieli yango mopanga pene.

²⁰Ngomba ezali kopesa yango matiti ya kolia, esika oyo banyama nyonso ya zamba esakanaka.

²¹Elalaka na se ya banzete ya mike-mike, na se ya matiti oyo ezalaka pembeni ya mayi mpe na potopoto.

²²Banzete ya mike-mike ebombaka yango na se ya elili na yango, banzete ya pepiliye ezingeli yango.

²³Soki mayi ya ebale etomboki, yango ebangaka te ; ata mayi ya Yordani esopaneli yango na monoko, evandaka kaka kimia.

²⁴Boni, moto akoki kokanga yango na motambo na tango ezali kotala to kotobola yango zolo na ndobo, mpo na kobenda yango ?

²⁵Boni, okoki koloba ngando na ndobo ? Okoki kokanga lolemo na yango na singa ?

²⁶Okoki kokanga yango singa ya kekele na zolo ? Okoki kotobola mbanga na yango na ndobo ?

²⁷Boni, ekobondela yo mingi ? Ekoloba na yo maloba ya boboto ?

²⁸Ekoki kosala boyokani elongo na yo mpo ete ekoma mowumbu na yo mpo na libela ?

²⁹Okoki kosakana na yango lokola ndeke ? Okoki kokanga yango na singa mpo na kosepelisa bana na yo ya basi ?

³⁰Boni, lisanga ya balobi mbisi bakoki kosala na yango mombongo ? Bakoki kokabola yango epai ya bateki ?

³¹Okoki kotobola mokongo na yango na makonga ? Okoki kotobola moto na yango na ndobo oyo bakangelaka bambisi ?

³²Tia loboko na yo na likolo na yango : soki okanisi etumba oyo okutani na yango, okozongela lisusu te kotia loboko na yo na likolo na yango.