Read Mokanda na Bomoi Yobo 41 Bible Online

Yobo 41 - Mokanda na Bomoi bible

Yobo 41

¹Liboso ya ngando yango, elikya nyonso ya kolonga ekomaka pamba ; soki kaka omoni yango, okweyi na somo.

²Moto moko te ya tembe akoki kotungisa yango ; boye nani akoki kotelemela ngai ?

³Nani adefisaki ngai eloko mpo ete nafuta niongo na ye ? Nyonso oyo ezali na se ya Lola ezali ya ngai.

⁴Nakoki kokanga monoko te mpo na kozanga kolobela biteni na yango ya nzoto, makasi na yango mpe kitoko ya nzoto na yango.

⁵Nani asila kolongola ngando poso na yango ya nzoto ? Nani asila kokatisa kati-kati ya milongo mibale ya minu na yango ?

⁶Nani asila kofungola bibebu ya monoko na yango ? Minu na yango etonda na somo.

⁷Mokongo na yango esalema na milongo mibale ya nguba, ekangama elongo na ezipelo ya mabanga.

⁸Ekangama moko na mosusu, mpe mopepe ekoki koleka kati na yango te.

⁹Ekangama moko na mosusu, esimbama elongo mpe ekoki kokabwana te.

¹⁰Soki ekosoli, zolo na yango ekobimisa pole ; mbuma ya miso na yango ezali lokola moyi ya tongo.

¹¹Moto makasi mpe moto mike-mike ebimaka na monoko na yango.

¹²Milinga ebimaka na zolo na yango lokola na mbeki oyo ezali kotoka to lokola nzungu ya ebende ya moto.

¹³Pema na yango epelisaka makala ya moto, lolemo ya moto ebimaka na monoko na yango.

¹⁴Makasi na yango evandi na kingo na yango, mpe somo ebimaka liboso na yango.

¹⁵Masusa ya poso ya nzoto na yango ekangama elongo, elendisama makasi mpe eninganaka te.

¹⁶Motema na yango ezali makasi lokola libanga, makasi lokola libanga oyo banikelaka bambuma.

¹⁷Soki etelemi, bato ya makasi babangaka, mpe somo ekimisaka bango.

¹⁸Soki obeti yango ezala mopanga, likonga to mbeli, ekosala yango eloko te.

¹⁹Emonaka ebende lokola lititi, bronze lokola nzete epola.

²⁰Mbanzi ekimisaka yango te, mpe mabanga oyo babwakaka na nzela ya ebambelo mabanga ezali lokola poso ya loso mpo na yango.

²¹Makonga ezali lokola matiti mpo na yango, mpe esekaka makelele ya makonga mike-mike.

²²Se ya libumu na yango etonda na banzube, etambolaka lokola ebende oyo ebalolaka mabele.

²³Eningisaka mayi ya mozindo lokola mayi oyo ezali kotoka na nzungu, ekomisaka ebale monene lokola nzungu oyo batokiselaka malasi.

²⁴Engengisaka nzela na sima na yango lokola suki ya pembe likolo ya mayi.

²⁵Na mokili, nyama moko te ekokani na yango ; mpe ebangaka te.

²⁶Ebangaka te kobundisa banyama minene, ezali mokonzi ya banyama nyonso ya lolendo. »