Read Mokanda na Bomoi Banzembo 10 Bible Online

Banzembo 10 - Mokanda na Bomoi bible

Banzembo 10

¹Yawe, mpo na nini otelemi mosika ? Mpo na nini obombami na tango ya pasi ?

²Na lolendo na ye, moto mabe oyo akangami na mabongisi na ye anyokolaka mobola.

³Pamba te moto mabe amikumisaka na tina na posa makasi ya motema na ye, apambolaka moto oyo azali na lokoso mpe afingaka Yawe.

⁴Na lolendo na ye, moto mabe alobaka : « Nzambe azalaka te. » Kati na makanisi na ye nyonso, ezali na esika te mpo na Nzambe.

⁵Misala na ye ekendeke liboso tango nyonso, asalaka keba te na mikano na Yo, Yawe ; atiolaka banguna na ye nyonso.

⁶Amilobelaka : « Eloko moko te ekotikala kolengisa ngai. » Alapaka ndayi boye : « Moko te akotikala kosala ngai mabe. »

⁷Monoko na ye etonda na bilakeli mabe, lokuta mpe mangungu ; abongisaka kaka pasi mpe mabe.

⁸Abombamaka pene ya bamboka. Wuta na bisika oyo abombamaka, abomaka moto oyo asali mabe te. Miso na ye ezelaka na kobombama bato ya koboma.

⁹Abombamaka lokola nkosi kati na evandelo na yango, abombamaka mpo na kokanga moto oyo azangi nguya ; akangaka moto oyo azangi nguya na kotindika ye pembeni ya motambo.

¹⁰Agumbaka ye mpe avandisaka ye na mabele, mpe akweyaka na se ya bokonzi na ye.

¹¹Amilobelaka : « Nzambe akotikala koyeba te, abombaka elongi na Ye mpe akotikala komona te. »

¹²Oh Yawe, telema. Nzambe, sembola loboko na Yo, kanisa babola.

¹³Mpo na nini moto mabe afinga Nzambe ? Mpo na nini amilobela : « Nzambe akopesa ngai etumbu te ? »

¹⁴Pamba te, Yo Nzambe, omoni pasi ya banyokolami ; otalaka pasi na bango mpe ozwaka yango kati na loboko na Yo. Banyokolami bamipesaka epai na Yo oyo osungaka bana bitike.

¹⁵Bebisa nguya ya moto mabe, pesa moto ya misala mabe etumbu mpo na mabe na ye, mpo ete emonana lisusu te.

¹⁶Yawe azali Mokonzi mpo na seko, bapagano bakozala lisusu te kati na mokili na Ye.

¹⁷Yawe, oyokaka posa ya banyokolami, olendisaka bango, mpe oyokaka koganga na bango,

¹⁸mpo na kolongisa mwana etike mpe monyokolami ; boye, bato ya mokili bakobangisa lisusu te.