Read Mokanda na Bomoi Banzembo 106 Bible Online

Banzembo 106 - Mokanda na Bomoi bible

Banzembo 106

¹Bokumisa Yawe ! Bosanzola Yawe, pamba te azali malamu, bolingo na Ye ewumelaka seko na seko !

²Nani akoloba misala minene ya Yawe ? Nani akopanza sango ya lokumu na Ye nyonso ?

³Esengo na bato oyo babatelaka mibeko mpe batambolaka na bosembo !

⁴Yawe, kanisa ngai tango okotalisa ngolu na Yo epai ya bato na Yo ! Salela ngai bolamu na nzela ya lobiko na Yo,

⁵mpo ete namona esengo ya baponami na Yo, nasepela na bolamu ya ekolo na Yo mpe nasepela elongo na libula na Yo !

⁶Solo, tosalaki masumu lokola batata na biso, tosalaki mabe mpe tomemaki ngambo.

⁷Tango batata na biso bazalaki na Ejipito, basosolaki eloko moko te kati na bikamwa na Yo ; babosanaki noki misala malamu na Yo, batombokaki pembeni ya ebale monene, ebale monene ya Barozo.

⁸Kasi abikisaki bango mpo na lokumu ya Kombo na Ye, mpo na kotalisa nguya na Ye.

⁹Agangelaki ebale monene ya Barozo, mpe ekawuki ; atambolisaki bango kati na mozindo lokola na esobe.

¹⁰Abikisaki bango wuta na maboko ya bayini na bango, akangolaki bango wuta na maboko ya monguna.

¹¹Mayi ezipaki banguna na bango, moko te atikalaki na bomoi.

¹²Bato na Ye bandimelaki maloba na Ye mpe bayembaki masanzoli na Ye.

¹³Kasi babosanaki noki misala na Ye, bazelaki te kokokisama ya mabongisi na Ye.

¹⁴Kati na esobe, bamipesaki na bilulela, bamekaki Nzambe kati na mabele oyo ezali na bato te.

¹⁵Apesaki bango biloko oyo bazalaki kosenga, kasi atindelaki bango lisusu pasi.

¹⁶Kati na molako, basalaki zuwa, batelemelaki Moyize mpe Aron, mosantu ya Yawe.

¹⁷Mabele efungwamaki mpe emelaki Datani, ezipaki lisanga ya Abirami.

¹⁸Moto ezikisaki lisanga na bango mpe etumbaki bato mabe wana nyonso.

¹⁹Na Orebi, basalaki mwana ngombe, bafukamelaki nzambe ya ekeko basala na ebende oyo banyangwisa na moto.

²⁰Babongolaki Nzambe na bango ya nkembo elilingi ya ngombe oyo eliaka matiti.

²¹Babosanaki Nzambe, Mobikisi na bango, oyo asalaki makambo minene kati na Ejipito,

²²bikamwa kati na mokili ya Cham mpe misala ya somo na ebale monene ya Barozo.

²³Azwaki mokano ya koboma bango nyonso. Kasi Moyize, moponami na Ye, atelemaki liboso na Ye mpo na kobondela ete akitisa kanda na Ye mpe aboma te.

²⁴Batiolaki mboka kitoko mpo ete bandimelaki maloba na Ye te.

²⁵Bayimaki-yimaki kati na bandako na bango ya kapo, batosaki mongongo ya Yawe te.

²⁶Asembolaki loboko, alapaki ndayi ya koboma bango kati na esobe,

²⁷ya kopanza bakitani na bango kati na bikolo mosusu mpe ya koboma bango kati na mikili nyonso.

²⁸Bamitiaki na se ya ekangiseli ya Bala ya Peori, baliaki bambeka oyo epesamaki epai ya banzambe oyo ekufa.

²⁹Batumbolaki kanda ya Yawe na nzela ya misala na bango ya mabe, mpe pasi makasi ekotaki kati na bongo.

³⁰Kasi Pineasi atelemaki, akataki makambo, mpe pasi yango esilaki.

³¹Mpo na yango, Pineasi atangamaki lokola moto ya sembo mpo na bikeke nyonso, seko na seko.

³²Bapesaki Nzambe kanda pene ya mayi ya Meriba mpe bamemisaki Moyize ngambo.

³³Mpo ete batombokelaki Molimo ya Nzambe, Moyize akomaki koloba maloba oyo esengeli te.

³⁴Babebisaki te bikolo oyo Yawe ayebisaki bango,

³⁵kasi basanganaki elongo na bapagano mpe bayekolaki bokoko ya bikolo na bango.

³⁶Bagumbamelaki banzambe na bango ya bikeko oyo ekomaki motambo mpo na bango.

³⁷Bapesaki bana na bango lokola bambeka epai ya milimo mabe.

³⁸Basopaki makila ya bato oyo basalaki mabe te, makila ya bana na bango, oyo bapesaki lokola mbeka epai ya banzambe ya bikeko ya Kanana. Boye mboka ekomaki mbindo mpo na makila ya bato.

³⁹Bamikomisaki mbindo mpe babebisaki lokumu na bango na nzela ya misala na bango.

⁴⁰Yawe asilikelaki bato na Ye, ayinaki libula na Ye.

⁴¹Akabaki bango na maboko ya bikolo ya bapaya, mpe banguna na bango bakomaki kokonza bango ;

⁴²banguna na bango banyokolaki bango mpe batiaki bango na se ya bokonzi na bango.

⁴³Akangolaki bango bambala ebele, kasi bazalaki kaka kosala mabongisi ya kotomboka mpe ya komipesa na bambeba na bango.

⁴⁴Yawe amonaki pasi na bango, tango ayokaki koganga na bango.

⁴⁵Akanisaki Boyokani oyo asalaki elongo na bango ; mpe mpo na bolingo monene na Ye, abongolaki mokano na Ye ya komonisa bango pasi.

⁴⁶Asalaki ete bato nyonso oyo bakomisaki bango bawumbu bayokela bango mawa.

⁴⁷Yawe, Nzambe na biso, bikisa biso ! Sangisa biso wuta na bikolo mosusu mpo ete tosanzola Kombo na Yo ya bule mpe tosepela na mosala ya kokumisa Yo.

⁴⁸Tika ete Yawe, Nzambe ya Isalaele, apambolama seko na seko ! Tika ete bato nyonso baloba : « Amen ! » Bokumisa Yawe !