Read Mokanda na Bomoi Banzembo 108 Bible Online

Banzembo 108 - Mokanda na Bomoi bible

Banzembo 108

¹Nzembo ya Davidi.

²Nzambe, motema na ngai ezali na kimia ! Nakoyembela Yo, nakosanzola Yo na mindule ; ezali mpe lokumu na ngai.

³Lindanda mpe nzenze, bolamuka ! Nalingi kolamusa tongo.

⁴Nkolo, nakosanzola Yo kati na bato, nakoyembela Yo kati na bikolo.

⁵Pamba te bolingo na Yo ezali monene koleka Lola, mpe bosembo na Yo ekenda kino na mapata.

⁶Oh Nzambe, tika ete otombolama na likolo ya Lola, mpe nkembo na Yo ezala awa na mokili mobimba !

⁷Bikisa biso na nguya ya loboko na Yo mpe yanola biso, mpo ete balingami na Yo bakangolama !

⁸Nzambe alobaki kati na Esika na Ye ya bule : « Nakolonga ! Nakokabola Sishemi mpe nakotia bandelo ya lubwaku ya Sukoti.

⁹Galadi ezali ya ngai, Manase mpe ezali ya ngai ; Efrayimi ezali ekoti na ngai ya ebende, mpe Yuda ezali lingenda na ngai ya bokonzi.

¹⁰Moabi ezali sani monene oyo nasukolelaka, Edomi ezali esika oyo nabwakaka sandale na ngai. Nazali kobeta milolo ya bitumba mpo na kobundisa mokili ya Filisitia. »

¹¹Nani akomema ngai na engumba batonga makasi ? Nani akotambolisa ngai kino na Edomi ?

¹²Ezali Yo te, Nzambe oyo obwakaki biso, Nzambe oyo ozalaki lisusu te kokende bitumba elongo na mampinga na biso !

¹³Yaka kosunga biso, kangola biso liboso ya moyini ! Pamba te lisungi ya bato ezali pamba.

¹⁴Elongo na Nzambe, tokosala makambo minene mpe ya kokamwa ; ezali Ye nde akonyata banguna na biso.