Read Mokanda na Bomoi Banzembo 109 Bible Online

Banzembo 109 - Mokanda na Bomoi bible

Banzembo 109

¹Wuta na buku ya mokambi ya bayembi. Nzembo ya Davidi. Nzambe, Yo oyo ngai nakumisaka, kovanda kimia te !

²Bato mabe bazali koloba lokuta mpo na kofunda ngai, bazali mpe kokosela ngai makambo.

³Bazingeli ngai na maloba ya koyina mpe bazali kobundisa ngai kaka pamba.

⁴Bato oyo ngai nalingaka bafundi ngai, kasi ngai namipesi na ngai kaka na mabondeli.

⁵Bazali kozongisela ngai mabe na bolamu, mpe koyina na bolingo.

⁶Kaba ye na maboko ya moto mabe ! Bimisela ye monguna, na ngambo ya loboko na ye ya mobali !

⁷Tika ete bazwa ye lokola moto mabe na tango ya kosamba, mpe libondeli na ye etangama lokola masumu !

⁸Tika ete mikolo ya bomoi na ye ekoma moke, tika ete moto mosusu azwa mokumba na ye !

⁹Tika ete bana na ye bakoma bana bitike, mpe tika ete mwasi na ye akoma mwasi akufisa mobali !

¹⁰Tika ete bana na ye batelengana mpe bakoma bisengasenga, tika ete bakende kosenga mosika ya ndako na bango oyo ebukana-bukana !

¹¹Tika ete moto oyo adefisaki ye mbongo akanga ye biloko nyonso, mpe tika ete bapaya babotola ye bambuma ya mosala na ye !

¹²Tika ete moko te atalisa ye bolingo, tika ete moko te ayokela bana bitike na ye mawa !

¹³Tika ete bakitani na ye basila na kokufa, mpe bakombo na bango elongwa na ekeke oyo ezali kolanda !

¹⁴Tika ete Yawe alandela masumu ya batata na ye mpe alimbisa te masumu ya mama na ye !

¹⁵Tika ete Yawe akanisaka masumu yango tango nyonso mpe asala ete babosana bango libela na mokili !

¹⁶Lokola atikalaki te kotambola na boboto, mpe lokola anyokolaki mobola mpe moto na mawa kino kobomisa moto oyo azoka na motema ;

¹⁷lokola azalaki kolinga mingi kolakela bato mabe, tika ete bilakeli mabe ekweyela ye ! Lokola azalaki kosepela te kopambola bato, tika ete mapamboli ezala mosika na ye !

¹⁸Tika ete alata elakeli mabe lokola kazaka, tika ete ekota kati na ye lokola mayi, mpe kati na mikuwa na ye lokola mafuta !

¹⁹Tika ete elakeli mabe yango elata ye lokola elamba oyo alati, mpe ekangama ye na loketo lokola mokaba mpo na tango nyonso !

²⁰Tala ndenge Yawe akofuta banguna na ngai mpe bato oyo balobaka mabe na tina na ngai.

²¹Kasi Yo Nkolo Yawe, salela ngai bolamu mpo na lokumu ya Kombo na Yo, kangola ngai kolanda boboto ya bolingo na Yo.

²²Solo, nazali mobola mpe moto na mawa, mpe motema na ngai ezali ya kozoka kati na ngai.

²³Nazali kokende lokola elili oyo ezali kolimwa ; bazali kobengana ngai lokola mabanki.

²⁴Mabolongo na ngai elembi mpo na kokila mingi bilei, nzoto na ngai mpe ebukani mpo ete nakondi makasi.

²⁵Mpo na bango, nakomi eloko ya nkele ; soki kaka bamoni ngai, baningisi mito.

²⁶Yawe, Nzambe na ngai, sunga ngai ; bikisa ngai kolanda bolingo na Yo !

²⁷Tika ete banguna na ngai bayeba ete Yo Yawe nde osalaki bongo.

²⁸Ata balakeli ngai mabe, Yo okopambola ngai ; soki mpe bameki kotelema mpo na kobundisa ngai, bakokufa soni. Nzokande ngai mosali na Yo, nakozala moto ya esengo.

²⁹Tika ete bayini na ngai bazanga lokumu mpe bamizipa na soni lokola kazaka.

³⁰Nakosanzola Yawe na mongongo makasi, nakokumisa Ye kati na ebele ya bato.

³¹Pamba te atelemaka na ngambo ya loboko ya mobali ya mobola mpo na kokangola ye wuta na maboko ya bato oyo bakatela ye etumbu.