Read Mokanda na Bomoi Banzembo 112 Bible Online

Banzembo 112 - Mokanda na Bomoi bible

Banzembo 112

¹Bokumisa Yawe ! Esengo na moto oyo atosaka Yawe mpe asepelaka makasi na mibeko na Ye.

²Bana na ye bakozala bato na nguya kati na mokili ; ekeke ya bato ya sembo ekopambolama.

³Ndako na ye ezali na bokolongono mpe na bomengo, mpe bosembo na ye ewumelaka mpo na seko.

⁴Pole engengaka kati na molili mpo na bato ya alima, mpo na moto oyo alimbisaka baninga, ayokelaka bato mawa mpe azali sembo.

⁵Esengo na moto oyo ayokelaka bato mawa mpe adefisaka, mpe asalaka misala na ye kolanda bosembo.

⁶Solo, aninganaka ata moke te. Bakanisaka misala ya moto ya sembo tango nyonso.

⁷Abangaka basango ya mabe te ; motema na ye ezali na kimia, atiaka elikya na ye kati na Yawe.

⁸Motema na ye eninganaka te, abangaka te kino akomona banguna na ye kozwa etumbu.

⁹Akabelaka babola na motema ya esengo ; bosembo na ye ewumelaka libela na libela, lokumu na ye ekitaka te.

¹⁰Moto mabe amonaka yango mpe asilikaka na zuwa, aliaka minu mpe alembaka nzoto. Posa ya bato mabe elimwaka.