Read Mokanda na Bomoi Banzembo 115 Bible Online

Banzembo 115 - Mokanda na Bomoi bible

Banzembo 115

¹Na biso te, Yawe, na biso te, kasi pesa nkembo na Kombo na Yo mpo na bolingo mpe boyengebene na Yo.

²Mpo na nini bikolo eloba : « Wapi Nzambe na bango ? »

³Nzambe na biso azali na Lola, asalaka nyonso oyo alingi.

⁴Kasi banzambe na bango ya bikeko ezali ya palata mpe ya wolo, esalema na maboko ya bato.

⁵Ezali na minoko, kasi elobaka te ; ezali na miso, kasi emonaka te ;

⁶ezali na matoyi, kasi eyokaka te ; ezali na zolo, kasi eyokaka solo te ;

⁷ezali na maboko, kasi esimbaka te ; ezali na makolo, kasi etambolaka te. Minoko na yango ebimisaka ata makelele te.

⁸Bato oyo basalaka yango mpe bato nyonso oyo batielaka yango motema bakokani na yango.

⁹Bana ya Isalaele, botia elikya kati na Yawe ! Azali lisungi mpe nguba na bango.

¹⁰Bakitani ya Aron, botia elikya kati na Yawe ! Azali lisungi mpe nguba na bino.

¹¹Bino bato oyo botosaka Yawe, botia elikya kati na Yawe. Azali lisungi mpe nguba na bango.

¹²Yawe akanisaka biso, akopambola ; solo, akopambola bana ya Isalaele, akopambola bakitani ya Aron.

¹³Akopambola bato oyo batosaka Yawe kobanda na bato pamba kino na bato minene.

¹⁴Tika ete Yawe afulukisa bino, bino mpe bana na bino !

¹⁵Tika ete Yawe apambola bino, Ye oyo asala likolo mpe mabele.

¹⁶Likolo ezali likolo ya Yawe ; kasi apesa mabele epai ya bato.

¹⁷Ezali te bakufi nde bakumisaka Yawe, pamba te bango nyonso bakendaka na esika ya kimia.

¹⁸Kasi biso, tokopambola Yawe, kobanda sik’oyo kino libela na libela. Bokumisa Yawe !