Read Mokanda na Bomoi Banzembo 116 Bible Online

Banzembo 116 - Mokanda na Bomoi bible

Banzembo 116

¹Nalingaka Yawe, pamba te ayokaka mongongo mpe mabondeli na ngai.

²Ayokaki ngai ; boye nakobelela Ye bomoi na ngai mobimba.

³Minyololo ya kufa ezingelaki ngai, somo ya mboka ya bakufi ekangaki ngai ; nakomaki moto ya pasi mpe ya mawa.

⁴Kasi nabelelaki Kombo ya Yawe : « Yawe, nabondeli Yo, bikisa ngai ! »

⁵Yawe asalaka ngolu mpe azali sembo, Nzambe na biso ayokelaka bato mawa.

⁶Yawe abatelaka bato oyo bazangi mayele. Nalembaki nzoto, kasi abikisi ngai.

⁷Molimo na ngai, zongela kimia na yo, pamba te Yawe asaleli yo bolamu.

⁸Solo, okangoli ngai na kufa, okawusi mpinzoli na ngai mpe obateli makolo na ngai ete ekweya te.

⁹Nakotambola liboso ya Yawe kati na mokili ya bato ya bomoi.

¹⁰Solo, nazalaka na elikya, ezala soki nalobaka : « Nazali moto na pasi makasi. »

¹¹Kati na mitungisi na ngai, nazalaki komilobela : « Bato nyonso bazali bakosi. »

¹²Nini nakoki kozongisela Yawe mpo na bolamu na Ye nyonso epai na ngai ?

¹³Nakotombola kopo ya elonga mpe nakobelela Kombo ya Yawe.

¹⁴Nakokokisa bandayi na ngai epai na Yawe na miso ya bato na Ye nyonso.

¹⁵Kufa ya bayengebene ya Yawe ezali na motuya makasi na miso na Ye.

¹⁶Yawe, yoka ngai, nazali mosali na Yo. Nazali mosali na Yo, mwana mobali ya mwasi mosali na Yo. Ofungoli minyololo oyo ekangaki ngai.

¹⁷Nakobonzela Yo mbeka mpo na kozongisa matondi, mpe nakobelela Kombo ya Yawe.

¹⁸Nakokokisa bandayi na ngai epai na Yawe na miso ya bato na Ye nyonso,

¹⁹kati na lopango ya Tempelo ya Yawe ; kati na yo, Yelusalemi. Bokumisa Yawe !