Read Mokanda na Bomoi Banzembo 118 Bible Online

Banzembo 118 - Mokanda na Bomoi bible

Banzembo 118

¹Bosanzola Yawe, pamba te azali malamu, pamba te bolingo na Ye ewumelaka seko na seko !

²Tika ete Isalaele aloba : « Pamba te bolingo na Ye ewumelaka seko na seko ! »

³Tika ete bakitani ya Aron baloba : « Pamba te bolingo na Ye ewumelaka seko na seko ! »

⁴Tika ete bato oyo batosaka Yawe baloba : « Pamba te bolingo na Ye ewumelaka seko na seko ! »

⁵Kati na pasi na ngai, nabelelaki Yawe, mpe Yawe ayanolaki ngai, abikisaki ngai.

⁶Yawe azali mpo na ngai, nakobanga te ; bato bakoki kosala ngai nini ?

⁷Yawe azali mpo na ngai, ayaka kosunga ngai ; boye natalaka banguna na ngai na miso lokola molongi.

⁸Eleki malamu koluka ebombamelo kati na Yawe na esika ya kotia elikya na bato.

⁹Eleki malamu koluka ebombamelo kati na Yawe na esika ya kotia elikya kati na bato minene ya mokili.

¹⁰Bikolo nyonso ezingelaki ngai, kasi nabebisaki bango na Kombo na Yawe.

¹¹Bakobaki kaka kozingela ngai, kasi nabebisaki bango na Kombo na Yawe.

¹²Bazingelaki ngai lokola banzoyi, kasi ekufaki lokola moto ya esobe ; nabebisaki yango na Kombo na Yawe.

¹³Batindikaki ngai mpo ete nakweyisa kondima, kasi Yawe asungaki ngai.

¹⁴Yawe azali makasi mpe nguya na ngai ; apesaki ngai elonga.

¹⁵Koganga ya esengo mpe ya elonga eyokanaka wuta na bandako ya kapo ya bato ya sembo, pamba te nguya na Yawe esalaka makambo minene !

¹⁶Yawe asembolaka loboko na Ye ya mobali, mpe nguya na Yawe esalaka makambo minene.

¹⁷Nakokufa te, nakozala na bomoi mpe nakopanza sango ya misala ya Yawe.

¹⁸Solo, Yawe apesaki ngai etumbu makasi ; kasi akabaki ngai na kufa te.

¹⁹Bofungolela ngai bikuke ya bosembo mpo ete nakota mpe nakumisa Yawe.

²⁰Tala ekuke ya Yawe ; bato ya sembo bakotelaka na ekuke yango.

²¹Nasanzolaka Yo, pamba te oyanolaki ngai mpe opesaki ngai elonga.

²²Libanga oyo batongi ndako babwakaki ekomi libanga ya songe ya ndako, mpe esimbi ndako mobimba.

²³Ezali Yawe nde alingaki bongo, mpe ezali penza likambo ya kokamwa na miso na biso !

²⁴Tala mokolo oyo Yawe asali ; tika ete tosepela mpe toganga na esengo mpo na mokolo yango !

²⁵Yawe, nabondeli Yo, pesa lobiko. Yawe, nabondeli Yo, pesa elonga.

²⁶Tika ete apambolama, Ye oyo ayei na Kombo ya Nkolo ! Tozali kopambola bino wuta na Tempelo ya Yawe.

²⁷Yawe azali Nzambe, mpe angengisaki biso. Bokota na molongo, bomema mandalala na maboko mpe bokende kino na maseke ya etumbelo.

²⁸Ozali Nzambe na ngai, nasanzolaka Yo ! Ozali Nzambe na ngai, nanetolaka Yo.

²⁹Bosanzola Yawe, pamba te azali malamu, pamba te bolingo na Ye ewumelaka seko na seko !