Read Mokanda na Bomoi Banzembo 119 Bible Online

Banzembo 119 - Mokanda na Bomoi bible

Banzembo 119

¹Esengo na bato oyo bazangi pamela mpe batambolaka kolanda mibeko ya Yawe !

²Esengo na bato oyo babatelaka malako na Ye mpe balukaka Ye na mitema na bango mobimba !

³Basalaka mabe te, kasi balandaka banzela ya Nzambe.

⁴Opesaki mibeko mpo ete etosama malamu.

⁵Tika ete nabongisa etamboli na ngai mpo ete natosa mitindo na Yo !

⁶Na bongo, nakoyoka soni te tango nakotosa mibeko na Yo nyonso.

⁷Nakosanzola Yo na motema ya sembo wana nakoyekola mibeko ya bosembo na Yo.

⁸Nalingi kotosa mitindo na Yo ; kosundola ngai libela te !

⁹Ndenge nini elenge akoki kowumela na nzela ya sembo ? Ezali na kotambola kolanda liloba na Yo.

¹⁰Nalukaka Yo na motema na ngai mobimba ; batela ngai mpo ete napengwa te mosika ya mibeko na Yo !

¹¹Nabatelaka liloba na Yo kati na motema na ngai mpo ete nasala masumu te na miso na Yo.

¹²Yawe, tika ete opambolama ! Lakisa ngai mitindo na Yo !

¹³Na monoko na ngai, natangaka mibeko na Yo nyonso.

¹⁴Nasepelaka kotambola kolanda malako na Yo lokola nde nazali na bomengo nyonso.

¹⁵Nakanisaka malako na Yo mpe natambolaka na banzela na Yo.

¹⁶Nasepelaka mingi na malako na Yo mpe nabosanaka liloba na Yo te.

¹⁷Salela ngai, mosali na Yo, bolamu mpo ete nabika mpe natosa liloba na Yo.

¹⁸Fungola miso na ngai mpo ete namona kitoko ya mibeko na Yo.

¹⁹Nazali mopaya awa na mokili ; kobombela ngai mibeko na Yo te.

²⁰Molimo na ngai ezalaka tango nyonso na posa makasi ya koyeba mibeko na Yo.

²¹Otelemelaka bato ya lofundu, bato oyo balakelama mabe mpe bapengwaka mosika ya mibeko na Yo.

²²Longola soni mpe kotiolama na bomoi na ngai, pamba te natosaka malako na Yo.

²³Ezala soki bakambi basali likita mpe bayokani kotelemela ngai, mosali na Yo, nakokanisa kaka mitindo na Yo.

²⁴Malako na Yo esepelisaka ngai makasi, epesaka ngai toli.

²⁵Nakangami na putulu ; batela bomoi na ngai kolanda liloba na Yo.

²⁶Nayebisaki Yo banzela na ngai, mpe oyanolaki ngai ; lakisa ngai mibeko na Yo !

²⁷Sala ete nasosola nzela ya mitindo na Yo mpo ete nakanisa misala minene na Yo !

²⁸Nazali kolela mpo na pasi na motema ; pesa ngai mpiko kolanda liloba na Yo.

²⁹Mema ngai mosika ya nzela ya lokuta ; mpe, na boboto na Yo, teya ngai mobeko na Yo.

³⁰Naponaki nzela ya bosolo ; natambolaka kolanda mibeko na Yo.

³¹Nakangami na malako na Yo ; Yawe, koyokisa ngai soni te.

³²Nakimaka mbangu kati na nzela ya mibeko na Yo, pamba te opesaka ngai bososoli na yango.

³³Yawe, teya ngai nzela ya mitindo na Yo mpo ete nabatela yango kino na suka.

³⁴Pesa ngai bososoli mpo ete natosa mibeko na Yo mpe nalanda yango na motema na ngai mobimba.

³⁵Tambolisa ngai kati na nzela ya mibeko na Yo, pamba te nasepelaka na yango.

³⁶Sala ete motema na ngai esepela na malako na Yo, kasi na bomengo te !

³⁷Longola miso na ngai na makambo ya pamba, batela bomoi na ngai kati na banzela na Yo !

³⁸Kokisela mosali na Yo bilaka oyo opesaki mpo na bato oyo batosaka Yo.

³⁹Longola mosika na ngai soni oyo nabangaka, pamba te mibeko na Yo ezali malamu.

⁴⁰Nasepelaka makasi na mibeko na Yo ; batela bomoi na ngai kati na bosembo na Yo !

⁴¹Yawe, tika ete bolingo ekomela ngai, mpe lobiko na Yo, kolanda elaka na Yo ;

⁴²bongo nakokoka kozwa eyano ya kopesa na mofingi na ngai, pamba te natiaka elikya na liloba na Yo.

⁴³Tika ete monoko na ngai elobaka kaka bosolo, pamba te natiaka elikya kati na mibeko na Yo.

⁴⁴Nakotosa mibeko na Yo tango nyonso, mpe libela na libela.

⁴⁵Nakobika na bonsomi ya solo, pamba te nasepelaka kotosa mitindo na Yo.

⁴⁶Nakolobela malako na Yo liboso ya bakonzi na kozanga koyoka soni.

⁴⁷Nasepelaka mingi na mibeko na Yo mpe nalingaka yango mingi.

⁴⁸Nalapi ndayi mpo na mibeko na Yo, oyo nalingaka, mpe nakokanisa mitindo na Yo.

⁴⁹Kanisa makambo oyo olobaki na mosali na Yo, pamba te opesaki ngai elikya.

⁵⁰Kati na pasi na ngai, liloba na Yo ebondisaka ; batela bomoi na ngai kolanda elaka na Yo.

⁵¹Solo, bato ya lolendo batiolaki ngai makasi ; kasi ngai, natikalaki kopengwa te na mibeko na Yo.

⁵²Yawe, tango nakanisaka mikano na Yo ya kala, nazwaka kati na yango kobondisama.

⁵³Nayokaka pasi mingi na motema tango namonaka bato mabe kosundola mibeko na Yo.

⁵⁴Nakoma koyemba mitindo na Yo na bisika nyonso epai wapi nazali moleki nzela.

⁵⁵Yawe, nakanisaka Yo na butu mpo ete nabatela mibeko na Yo ;

⁵⁶pamba te libula na ngai ezali : kotosa mibeko na Yo.

⁵⁷Yawe, nalobi lisusu ete libula na ngai ezali : kotosa liloba na Yo.

⁵⁸Na motema na ngai mobimba, nalukaka kosepelisa Yo ; salela ngai ngolu kolanda bilaka na Yo !

⁵⁹Natali malamu etamboli na ngai mpe namizongisi kati na malako na Yo.

⁶⁰Natosaka mibeko na Yo noki, nazelisaka te.

⁶¹Solo, mitambo ya bato mabe ekangaki ngai, kasi ngai nabosanaki te mibeko na Yo.

⁶²Na kati-kati ya butu, nalamukaka mpo na kokumisa Yo likolo na mibeko na Yo ya sembo.

⁶³Nazali moninga ya bato nyonso oyo batosaka Yo mpe babatelaka mitindo na Yo.

⁶⁴Yawe, mokili etondi na bolingo na Yo ; lakisa ngai mitindo na Yo !

⁶⁵Yawe, salela mosali na Yo bolamu kolanda liloba na Yo.

⁶⁶Teya ngai bolamu ya bososoli mpe ya mayele, pamba te namipesaka na mibeko na Yo.

⁶⁷Liboso ete obeta ngai, nazalaki mopengwi ; kasi sik’oyo, nakomi kotosa liloba na Yo.

⁶⁸Ozali malamu mpe osalaka makambo ya malamu ; teya ngai mitindo na Yo !

⁶⁹Bato ya lolendo bakoselaka ngai makambo ; kasi ngai, natosaka mitindo na Yo na motema na ngai mobimba.

⁷⁰Mitema na bango ezali mabanga ; kasi ngai, nasepelaka na mibeko na Yo.

⁷¹Ezalaki penza malamu mpo na ngai ete obeta ngai, mpo ete nayekola mitindo na Yo.

⁷²Mpo na ngai, mibeko oyo ozwaki mpe osakolaki na monoko na Yo ezali malamu koleka biloko nkoto moko ya wolo mpe ya palata.

⁷³Osalaki mpe olendisaki ngai na maboko na Yo, pesa ngai mayele mpo ete nayekola mibeko na Yo !

⁷⁴Tango bato oyo batosaka Yo bamonaka ngai, basepelaka makasi, mpo ete natiaka elikya na liloba na Yo.

⁷⁵Yawe, nayebi malamu ete mibeko na Yo ezali sembo, mpe ete ezali kaka mpo na bolingo na Yo nde obetaki ngai.

⁷⁶Tika ete bolingo na Yo ebondisa ngai, kolanda elaka na Yo epai ya mosali na Yo !

⁷⁷Talisa ngai mawa na Yo mpo ete nabika, pamba te nasepelaka na mibeko na Yo.

⁷⁸Tika ete bato wana ya lofundu, oyo bamonisaka ngai pasi na kozanga tina, bakufa soni ! Kasi ngai nakokanisa kaka mibeko na Yo.

⁷⁹Tika ete bato oyo batosaka Yo, ba-oyo bayebi malako na Yo, bazongela ngai.

⁸⁰Tika ete motema na ngai ezanga pamela mpo na kotosa mitindo na Yo, mpo ete nakufa soni te.

⁸¹Natondi na posa ya lobiko na Yo, nazali na elikya kati na liloba na Yo.

⁸²Miso na ngai elembi kozela kokokisama ya elaka na Yo ; nakomi komituna : « Okobondisa ngai tango nini ? »

⁸³Nakomi lokola mbeki oyo ezali kokawuka na milinga, nzokande nabosanaka mitindo na Yo te.

⁸⁴Mikolo ya bomoi ya mosali na Yo ezali motango boni ? Mokolo nini okopesa banyokoli na ngai etumbu ?

⁸⁵Bato ya lolendo batimoli mabulu mpo na kokanga ngai, baboyi kotosa mibeko na Yo.

⁸⁶Mibeko na Yo nyonso ezali sembo ; kasi bazali konyokola ngai kaka pamba ; yaka kosunga ngai !

⁸⁷Etikali moke mpo ete balongola ngai na mokili ; kasi atako bongo, nasundoli mibeko na Yo te.

⁸⁸Kati na bolingo na Yo, batela bomoi na ngai mpo ete natosa malako na Yo.

⁸⁹Yawe, liloba na Yo ezali mpo na seko, epikama kati na likolo ;

⁹⁰boyengebene na Yo ekowumela seko na seko. Okela mabele, mpe ezali kaka kino na mokolo ya lelo ;

⁹¹opesa mibeko, mpe ezali kaka kino na mokolo ya lelo, pamba te nyonso kati na mokili mobimba epesaka Yo lokumu.

⁹²Soki nasepelaki na mibeko na Yo te, mbele nakufa kala kati na pasi na ngai.

⁹³Nakotikala kobosana ata moke te mitindo na Yo, pamba te obatelaka bomoi na ngai na nzela na yango.

⁹⁴Bikisa ngai, pamba te nazali moto na Yo mpe natosaka mitindo na Yo !

⁹⁵Bato mabe bazali koluka koboma ngai, kasi ngai nakangami kaka na malako na Yo.

⁹⁶Na nyonso oyo emonanaka lokola ya kokoka, namonaki mondelo ; kasi mibeko na Yo ezalaka na mondelo te.

⁹⁷Nalingaka mibeko na Yo mingi ! Nakanisaka yango mikolo nyonso.

⁹⁸Mibeko na Yo ekomisaka ngai moto ya bwanya koleka banguna na ngai ; ezalaka elongo na ngai tango nyonso.

⁹⁹Naleki balakisi na ngai nyonso na mayele, pamba te nakanisaka malako na Yo.

¹⁰⁰Naleki mibange na bososoli, pamba te natosaka mibeko na Yo.

¹⁰¹Natambolaka te na banzela nyonso ya mabe mpo na kotosa liloba na Yo.

¹⁰²Nakangamaka na mibeko na Yo, pamba te Yo moko nde oteyaka ngai yango.

¹⁰³Tala ndenge mitindo na Yo ezali elengi na monoko na ngai ! Ezali malamu koleka mafuta ya nzoyi.

¹⁰⁴Mitindo na Yo ekomisi ngai moto ya bososoli ; yango wana nayinaka nzela nyonso ya mabe.

¹⁰⁵Liloba na Yo ezali mwinda mpo na makolo na ngai, mpe pole mpo na nzela na ngai.

¹⁰⁶Nalapaki ndayi oyo mpe nakokokisa yango : « Nakotosaka mibeko ya bosembo na Yo. »

¹⁰⁷Motema na ngai etutami makasi ; Yawe, batela bomoi na ngai kolanda liloba na Yo.

¹⁰⁸Yawe, ndima likabo ya bibebu na ngai, mpe teya ngai mibeko na Yo.

¹⁰⁹Solo, nakutanaka tango nyonso na makama, kasi nabosanaka mibeko na Yo te.

¹¹⁰Bato mabe batiaka mitambo mpo ete nakweya, kasi nakangamaka kaka na mibeko na Yo.

¹¹¹Malako na Yo ezali libula na ngai mpo na libela, esalaka esengo ya motema na ngai.

¹¹²Nazwa mokano ya kotambola kolanda mitindo na Yo, tango nyonso, kino na suka.

¹¹³Nayinaka bato ya mitema mibale, kasi nalingaka nde mibeko na Yo.

¹¹⁴Ozali ebombamelo mpe nguba na ngai ; natiaka elikya kati na liloba na Yo.

¹¹⁵Bato ya misala mabe, bokende mosika na ngai ! Nakotosa mibeko ya Nzambe na ngai !

¹¹⁶Sunga ngai kolanda elaka na Yo, mpe nakobika ; koyokisa elikya na ngai soni te.

¹¹⁷Sunga ngai mpo ete nabika ; nakotikala kobosana mitindo na Yo ata moke te.

¹¹⁸Obwakaka bato nyonso oyo bapesaka mitindo na Yo mokongo, pamba te mokano na bango ezalaka ya lokuta.

¹¹⁹Olongolaka bato nyonso ya mabe ya mokili lokola bosoto ; yango wana nalingaka malako na Yo.

¹²⁰Nalengaka na somo liboso na Yo mpe nabangaka mikano na Yo.

¹²¹Natambolaka na bosembo mpe bosolo ; kokaba ngai na maboko ya banyokoli na ngai te !

¹²²Kamata mokumba ya bolamu na ngai, mosali na Yo ; tika ete bato ya lolendo banyokola ngai te.

¹²³Miso na ngai elembi kozela lisungi kowuta na Yo mpe kokokisama ya bosembo na Yo kolanda elaka na Yo.

¹²⁴Salela ngai, mosali na Yo, kolanda bolingo na Yo, lakisa ngai mitindo na Yo.

¹²⁵Nazali mosali na Yo ; pesa ngai mayele mpo ete nasosola malako na Yo.

¹²⁶Yawe, tango ya kosala ekoki ; pamba te bazali kobuka mibeko na Yo !

¹²⁷Yango wana nalingaka mibeko na Yo koleka wolo, koleka kutu wolo ya peto ;

¹²⁸namonaka mpe malako na Yo nyonso alima ; nzokande, nayinaka lokuta nyonso.

¹²⁹Malako na Yo ezali kitoko, yango wana nabatelaka yango.

¹³⁰Emoniseli ya liloba na Yo engengisaka, epesaka bazoba mayele.

¹³¹Monoko na ngai efungwamaka makasi likolo ya kozela, pamba te nazali na posa makasi ya mibeko na Yo.

¹³²Baluka epai na ngai mpe talisa ngai ngolu na Yo kolanda ndenge okata mpo na bato oyo balingaka Kombo na Yo.

¹³³Lendisa bomoi na ngai na nzela ya liloba na Yo mpe pekisa mabe ete ekonza ngai te.

¹³⁴Kangola ngai wuta na minyoko ya bato, mpe nakotosa mibeko na Yo.

¹³⁵Tika ete elongi na Yo engengela ngai, mosali na Yo ; lakisa ngai mibeko na Yo !

¹³⁶Miso na ngai ezali kosopa mpinzoli, pamba te mibeko na Yo ezali kotosama te.

¹³⁷Yawe, ozali sembo, mpe mibeko na Yo ezali alima ;

¹³⁸osalaki malako na Yo na bosembo mpe na bolingo.

¹³⁹Mpo ete banguna na ngai bazwaka liloba na Yo na motuya te, nayokaka kanda makasi komata ngai na motema.

¹⁴⁰Nzokande liloba na Yo ezali penza peto ; mpe ngai, mosali na Yo, nalingaka yango.

¹⁴¹Atako nazali moke mpe batiolaka ngai, kasi nabosanaka mitindo na Yo te.

¹⁴²Bosembo na Yo ekotikala bongo mpo na libela, ekotikala kobongwana te ; mpe mibeko na Yo ezali solo.

¹⁴³Pasi ekangi ngai, mpe mayele esili ngai ; kasi mibeko na Yo epesaka ngai esengo.

¹⁴⁴Malako na Yo ezali sembo mpo na libela ; pesa ngai bososoli mpo ete nabika !

¹⁴⁵Nazali kobelela Yo na motema na ngai mobimba : « Yawe, yanola ngai ; nakotosa mitindo na Yo !

¹⁴⁶Nazali kobelela Yo : bikisa ngai, mpo ete natosa malako na Yo !

¹⁴⁷Nalamukaka liboso ete tongo etana mpo na kobelela Yo, nazali na elikya kati na liloba na Yo.

¹⁴⁸Nalamukaka na kati-kati ya butu mpo na kokanisa mitindo na Yo.

¹⁴⁹Yoka ngai na bolingo na Yo ! Yawe, batela bomoi na ngai kolanda mibeko na Yo !

¹⁵⁰Bato oyo basalaka mabongisi mabe, oyo batosaka mibeko na Yo te, bazali koya pene na ngai.

¹⁵¹Nzokande Yo, Yawe, ozali pene, mpe mibeko na Yo nyonso ezali bosolo.

¹⁵²Wuta kala, ngai nayebi, na nzela ya malako na Yo, ete otia mibeko yango mpo na libela.

¹⁵³Mona malamu pasi na ngai mpe kangola ngai, pamba te nabosanaka mibeko na Yo te.

¹⁵⁴Kota likambo na ngai mpe kangola ngai, batela bomoi na ngai kolanda elaka na Yo !

¹⁵⁵Lobiko ezalaka mosika ya bato mabe, pamba te bamonaka pamba mitindo na Yo.

¹⁵⁶Yawe, mawa na Yo ezali monene penza ; batela bomoi na ngai kolanda mibeko na Yo.

¹⁵⁷Banyokoli mpe banguna na ngai bazali solo ebele, kasi ngai nakangamaka kaka na malako na Yo.

¹⁵⁸Natalaka na nkele bato oyo bazangi kondima, ba-oyo batosaka liloba na Yo te.

¹⁵⁹Yawe, tala ndenge nalingaka mitindo na Yo ! Batela bomoi na ngai kolanda bolingo na Yo.

¹⁶⁰Moboko ya liloba na Yo ezali bosolo, mpe mibeko nyonso ya bosembo na Yo ezali mpo na libela.

¹⁶¹Bakambi banyokolaka ngai kaka pamba, kasi kaka liloba na Yo nde ebangisaka motema na ngai.

¹⁶²Nasepelaka na liloba na Yo lokola moto oyo azwi bomengo ebele ya bitumba.

¹⁶³Nayinaka lokuta mpe nayokaka yango nkele, nalingaka nde mibeko na Yo.

¹⁶⁴Nakumisaka Yo mbala sambo na mokolo mpo na mibeko ya bosembo na Yo.

¹⁶⁵Bato oyo balingaka mibeko na Yo bazali bato na kimia monene, mpe eloko moko te ekobetisa bango lisusu mabaku.

¹⁶⁶Yawe, natielaka Yo motema mpo ete obikisa ngai, mpe natosaka mibeko na Yo.

¹⁶⁷Natosaka malako na Yo, pamba te nalingaka yango makasi.

¹⁶⁸Natosaka malako mpe mibeko na Yo, pamba te oyebi banzela na ngai nyonso.

¹⁶⁹Yawe, tika ete koganga na ngai ekoma kino epai na Yo ! Pesa ngai bososoli kolanda liloba na Yo !

¹⁷⁰Tika ete mabondeli na ngai ekoma kino epai na Yo ! Kangola ngai kolanda elaka na Yo.

¹⁷¹Tika ete bibebu na ngai ekumisa Yo, pamba te olakisaka ngai mitindo na Yo !

¹⁷²Tika ete lolemo na ngai eyemba liloba na Yo, pamba te mibeko na Yo nyonso ezali sembo.

¹⁷³Tika ete loboko na Yo esunga ngai, pamba te napona kolanda malako na Yo.

¹⁷⁴Yawe, nazali na posa makasi ya lobiko na Yo ; mibeko na Yo epesaka ngai esengo.

¹⁷⁵Tika ete nazala na bomoi mpo na kokumisa Yo, mpe tika ete mibeko na Yo esunga ngai !

¹⁷⁶Nazali koyengayenga lokola meme oyo ebungi ; luka ngai, mosali na Yo, pamba te nabosani mibeko na Yo te. »