Read Mokanda na Bomoi Banzembo 132 Bible Online

Banzembo 132 - Mokanda na Bomoi bible

Banzembo 132

¹Nzembo ya mobembo mpo na kokende na Tempelo ya Yawe. Yawe, kanisa Davidi ; kanisa pasi na ye nyonso !

²Alapaki ndayi oyo epai na Yawe, epai ya Elombe ya Jakobi :

³« Nakokota na ndako na ngai te, nakomata na mbeto na ngai te,

⁴nakokanga miso na ngai te mpo na kolala pongi to mpo na konimba mwa moke

⁵kino nakozwa Esika mpo na Yawe, Ndako mpo na Elombe ya Jakobi. »

⁶Toyokaki sango na tina na yango na Efrata, tomonaki yango na elanga ya Yari.

⁷Tokende na Ndako na Ye, togumbama liboso ya enyatelo makolo na yango.

⁸Yawe, telema, yaka na Esika na Yo ya bopemi ! Yaka elongo na Sanduku ya Boyokani epai wapi nguya na Yo ezali.

⁹Tika ete Banganga-Nzambe na Yo balata bosembo lokola elamba ; mpe tika ete basantu na Yo baganga na esengo !

¹⁰Mpo na Davidi, mosali na Yo, kobengana mopakolami na Yo te !

¹¹Yawe alapaki epai ya Davidi ndayi ya solo, oyo akowangana te : « Nakotia moko kati na bakitani na yo na kiti na yo ya bokonzi.

¹²Soki bana na yo babateli boyokani mpe mibeko na ngai, bana na bango mpe bakokitana na yo lokola bakonzi, mpe ekosalema bongo mpo na libela. »

¹³Pamba te Yawe aponaki Siona, asepelaki kokomisa yango Esika na Ye ya kovanda :

¹⁴« Ezali Esika na ngai ya bopemi mpo na libela ; nakovanda awa, pamba te nasepelaki na yango.

¹⁵Nakopambola, nakopambola yango na biloko ebele, nakotondisa babola na yango na bilei.

¹⁶Nakolatisa Banganga-Nzambe na yango lobiko, mpe bato na yango bakoganga na esengo.

¹⁷Kuna na Siona, nakobakisa nguya ya Davidi, mpe nakobimisela ye mokitani, mopakolami na ngai, lokola mwinda ya kopela.

¹⁸Nakoyokisa banguna na ye soni, mpe motole na ye ekongenga na mbunzu na ye. »