Read Mokanda na Bomoi Banzembo 135 Bible Online

Banzembo 135 - Mokanda na Bomoi bible

Banzembo 135

¹Bokumisa Yawe ! Bokumisa Kombo ya Yawe ! Bokumisa Ye, bino basali ya Yawe,

²oyo botelemaka kati na Ndako ya Yawe, kati na lopango ya Ndako ya Nzambe na biso !

³Bokumisa Yawe ! Pamba te Yawe azali malamu ! Boyembela Kombo na Ye, pamba te ezali kitoko makasi.

⁴Pamba te Yawe aponaki Jakobi, Isalaele, mpo ete azala ya Ye moko.

⁵Solo, ngai nayebi malamu ete Yawe azali monene, ete Nkolo na biso aleki banzambe nyonso.

⁶Yawe asalaka nyonso oyo alingi, kuna na likolo mpe awa na mabele, kati na bibale minene mpe kati na mozindo nyonso.

⁷Amatisaka mapata wuta na suka ya mokili, atindaka mikalikali elongo na mvula, abimisaka mopepe wuta na bibombelo na yango.

⁸Ye nde abomaki bana ya liboso ya Ejipito, kobanda na bato kino na banyama ;

⁹atindaki bilembo ya kokamwa mpe bikamwa kati na yo, Ejipito, mpo na kotelemela Faraon mpe basali na ye nyonso ;

¹⁰abebisaki bikolo ebele mpe abomaki bakonzi ya nguya :

¹¹Sikoni, mokonzi ya bato ya Amori ; Ogi, mokonzi ya Bashani ; mpe bakonzi nyonso ya Kanana.

¹²Mpe akabaki mikili na bango lokola libula, lokola libula epai ya bato na Ye, Isalaele.

¹³Oh Yawe, sango ya Kombo na Yo ewumelaka libela na libela ! Yawe, bakopanza sango ya Kombo na Yo seko na seko !

¹⁴Pamba te Yawe akolimbisa bato na Ye, akoyokela basali na Ye mawa.

¹⁵Banzambe ya bikolo ezali ya palata mpe ya wolo, esalema na maboko ya bato.

¹⁶Ezali na minoko, kasi elobaka te ; ezali na miso, kasi emonaka te ;

¹⁷ezali na matoyi, kasi eyokaka te ; ezali ata na pema te kati na minoko na yango.

¹⁸Bato oyo basalaka yango mpe bato nyonso oyo batielaka yango motema bakokani na yango.

¹⁹Bato ya Isalaele, bopambola Yawe ! Bakitani ya Aron, bopambola Yawe !

²⁰Bakitani ya Levi, bopambola Yawe ! Bino nyonso oyo botosaka Yawe, bopambola Yawe !

²¹Tika ete, wuta na Siona, Yawe apambolama, Ye oyo avandaka na Yelusalemi ! Bokumisa Yawe !