Read Mokanda na Bomoi Banzembo 144 Bible Online

Banzembo 144 - Mokanda na Bomoi bible

Banzembo 144

¹Nzembo ya Davidi. Tika ete Yawe, Libanga na ngai, apambolama ; Ye oyo akembisaka maboko mpe makofi na ngai mpo na bitumba !

²Azali bolingo na ngai mpe ndako na ngai ya makasi, ebombamelo mpe mokangoli na ngai, nguba mpe ekimelo na ngai ; Ye nde atiaka bato na ngai na se ya bokonzi na ngai.

³Oh Yawe, moto nde nani mpo ete obatelaka ye ? Moto nde nani mpo ete okanisaka ye ?

⁴Moto azali lokola mopepe, mikolo ya bomoi na ye ezali lokola elili oyo ezali koleka.

⁵Yawe, fungola likolo mpe kita awa na mabele ! Yaka kosimba bangomba mpe sala ete ebimisa milinga !

⁶Tinda mikalikali mpe panza banguna na ngai ; bwakela bango makonga na Yo mpe bungisa bango nzela.

⁷Tanda loboko na Yo wuta kuna na likolo mpo na kobikisa mpe kokangola ngai na mayi minene, na maboko ya bapaya

⁸oyo minoko na bango elobaka kaka lokuta mpe maboko na bango elapaka ndayi ya lokuta.

⁹Oh Nzambe, nakoyembela Yo nzembo ya sika, nakobetela Yo lindanda ya basinga zomi.

¹⁰Ezali Yo, Nzambe, nde opesaka bakonzi elonga, obikisaka Davidi, mosali na Yo, liboso ya mopanga oyo ebomaka.

¹¹Bikisa mpe kangola ngai na maboko ya bapaya oyo minoko na bango elobaka kaka lokuta mpe maboko na bango elapaka ndayi ya lokuta.

¹²Bana mibali na biso bazali lokola milona, bazali kokola malamu wuta na bomwana na bango ; bana basi na biso bazali lokola bililingi kitoko oyo batoboli na bamir ya ndako ya mokonzi.

¹³Bibombelo na biso etondi na biloko ya ndenge na ndenge ; bameme na biso ezali kobotana na minkoko, na bankoto zomi kati na bitonga na biso ;

¹⁴bangombe na biso ezali minene ; likama ezali te, zemi ezali kosopana te, mpe koganga moko te ya pasi ezali koyokana na bisika na biso.

¹⁵Esengo na bato oyo batondisami na bolamu ya boye ! Esengo na bato oyo Yawe azali Nzambe na bango !