Read Mokanda na Bomoi Banzembo 145 Bible Online

Banzembo 145 - Mokanda na Bomoi bible

Banzembo 145

¹Masanzoli. Nzembo ya Davidi. Nakotombola Yo, Nzambe na ngai, Mokonzi na ngai ; nakopambola Kombo na Yo seko na seko.

²Mikolo nyonso, nakopambola Yo mpe nakokumisa Kombo na Yo libela na libela.

³Yawe azali monene, abongi na lokumu ; moko te akoki komeka mozindo ya monene na Ye.

⁴Bikeke nyonso ekotombola kitoko ya misala na Yo mpe ekopanza sango ya misala na Yo ya minene.

⁵Nakolemba te kotatola bikamwa na Yo mpe kongenga makasi ya nkembo na Yo.

⁶Bakolobela nguya na Yo ya somo, mpe ngai, nakosakola misala na Yo ya minene.

⁷Bakokanisa misala minene ya bolamu na Yo, bakobetela bosembo na Yo maboko.

⁸Yawe atonda na ngolu mpe na mawa, asilikaka noki te mpe atonda na bolingo.

⁹Yawe azali malamu mpo na bato nyonso, atonda na mawa mpo na bikelamu na Ye nyonso.

¹⁰Yawe, misala na Yo nyonso ekumisaka Yo ! Tika ete bayengebene na Yo bapambola Yo !

¹¹Bazali koloba ete bokonzi na Yo etondi na nkembo mpe bazali kopanza sango ya misala ya nguya na Yo.

¹²Bazali koyebisa bato misala na Yo ya minene mpe kongenga ya nkembo ya bokonzi na Yo.

¹³Ozali Mokonzi seko na seko, mpe bokonzi na Yo ekowumela libela na libela. Yawe akokisaka bilaka na Ye nyonso, asalaka nyonso na bolingo.

¹⁴Yawe alendisaka bato nyonso oyo bakweyaka, atelemisaka bato nyonso oyo balembaka.

¹⁵Na bato nyonso oyo batalelaka Yo, opesaka bilei na tango oyo ekoki.

¹⁶Ofungolaka loboko na Yo mpe okokisaka posa ya nyonso oyo ezali na bomoi.

¹⁷Yawe azali sembo na nyonso oyo asalaka mpe atonda na bolingo kati na misala na Ye nyonso.

¹⁸Yawe azali pene ya bato nyonso oyo babelelaka Ye, ya bato nyonso oyo babelelaka Ye na solo ;

¹⁹akokisaka posa ya bato oyo batosaka Ye, ayokaka mpe abikisaka bango tango babelelaka Ye.

²⁰Yawe abatelaka bato nyonso oyo balingaka Ye, kasi abebisaka bato nyonso ya mabe.

²¹Tika ete monoko na ngai ekumisa Yawe ! Tika ete bikelamu nyonso epambola Kombo na Ye ya bule libela na libela !