Read Mokanda na Bomoi Banzembo 146 Bible Online

Banzembo 146 - Mokanda na Bomoi bible

Banzembo 146

¹Bokumisa Yawe ! Oh molimo na ngai, kumisa Yawe !

²Nakokumisa Yawe bomoi na ngai mobimba, nakosanzola Nzambe na ngai tango nyonso nakozala na bomoi.

³Botia elikya te na bakambi to na bato oyo bazangi makoki ya kobikisa.

⁴Soki bakufi, bazongaka na mabele, mpe, mbala moko, mabongisi na bango elimwaka.

⁵Esengo na moto oyo Nzambe ya Jakobi azali mosungi na ye, oyo atiaka elikya na ye kati na Yawe, Nzambe na ye !

⁶Yawe akelaki Likolo mpe mabele, ebale monene mpe nyonso oyo ezali kati na yango ; azali sembo seko na seko.

⁷Yawe akataka na sembo makambo ya banyokolami mpe apesaka bilei na bato oyo bazali na nzala ; abimisaka bakangami na boloko.

⁸Yawe abikisaka miso ya bakufi miso ; Yawe asembolaka bato oyo bazali ya kogumbama ; Yawe alingaka bato ya sembo.

⁹Yawe abatelaka bapaya, asungaka mwana etike mpe mwasi oyo akufisa mobali, kasi abebisaka banzela ya bato mabe.

¹⁰Yawe azali Mokonzi seko na seko ; Nzambe na yo, oh Siona, libela na libela ! Bokumisa Yawe !