Read Mokanda na Bomoi Banzembo 148 Bible Online

Banzembo 148 - Mokanda na Bomoi bible

Banzembo 148

¹Bokumisa Yawe ! Bokumisa Yawe wuta na likolo, bokumisa Ye na bisika oyo eleki likolo.

²Bokumisa Ye, bino ba-anjelu na Ye nyonso ; bokumisa Ye, bino mampinga na Ye nyonso ;

³bokumisa Ye, bino moyi mpe sanza ; bokumisa Ye, bino minzoto nyonso oyo engengaka ;

⁴bokumisa Ye, bino oyo boleki likolo kati na likolo, mpe bino mayi oyo bozali na likolo !

⁵Tika ete ekumisa Kombo ya Yawe ! Pamba te apesaki mitindo, mpe ekelamaki.

⁶Atiaki yango mpo na libela ; apesaki mibeko oyo ekobongwana te.

⁷Bokumisa Yawe wuta na mokili, ezala bilima ya mayi to mozindo nyonso,

⁸ezala moto to mvula ya mabanga, ezala mvula ya pembe to londende, ezala mopepe makasi oyo ekokisaka liloba na Ye ;

⁹ezala bangomba milayi to bangomba mikuse, ezala banzete oyo ebotaka bambuma to banzete ya sedele,

¹⁰ezala banyama ya zamba to bibwele nyonso, ezala bikelamu oyo etambolaka na libumu to bandeke,

¹¹ezala bakonzi ya mabele to bikolo nyonso, ezala bakambi to batambolisi nyonso ya mokili,

¹²ezala bilenge mibali to bilenge basi, ezala bampaka to bana mike !

¹³Tika ete bakumisa Kombo ya Yawe ! Pamba te Ye moko kaka nde aleki likolo ; nkembo na Ye eleki mabele mpe likolo.

¹⁴Abongisi elombe mokangoli mpo na bato na Ye ! Ezali likambo oyo bayengebene na Ye nyonso, bana nyonso ya Isalaele, bato oyo balingaka Ye, basengeli kokumisa Yawe mpo na yango. Bokumisa Yawe !