Read Mokanda na Bomoi Banzembo 16 Bible Online

Banzembo 16 - Mokanda na Bomoi bible

Banzembo 16

¹Nzembo ya Davidi. Nzambe, batela ngai, pamba te nabombami kati na Yo.

²Nalobaka na Yawe : « Ozali Nkolo na ngai, Yo moko kaka nde ozali bolamu na ngai. »

³Natatolaka na tina na basantu oyo bazali kati na mboka ete bazali penza bato minene oyo nasepelaka na bango makasi.

⁴Bato oyo bapotaka mbangu mpo na koluka bolamu epai ya banzambe mosusu bakomona pasi mingi. Nakosopa te mbeka na bango ya makila epai ya banzambe ya lolenge wana mpe nakotanga bakombo na yango te na bibebu na ngai.

⁵Yawe, Yo moko kaka nde ozali libula mpe bomoi na ngai ; ozali ndanga ya bozwi na ngai.

⁶Nazwi etando ya motuya makasi, ezali libula ya kitoko penza mpo na ngai !

⁷Nakopambola Yawe oyo apesaka ngai toli mpe, ezala na butu, angengisaka makanisi na ngai.

⁸Natalelaka Yawe tango nyonso, pamba te azali pene na ngai mpo ete naningana te.

⁹Yango wana motema na ngai etondi na esengo, molimo na ngai ezali kosepela, nzoto na ngai mpe ekopema na kimia.

¹⁰Oh Yawe, okosundola ngai te kati na mboka ya bakufi, okotika mpe te ete mosantu na Yo apola.

¹¹Okolakisa ngai nzela ya bomoi ; okotondisa ngai na esengo kati na bozalisami na Yo, elongo na bilengi ya suka te na ngambo ya loboko na Yo ya mobali.