Read Mokanda na Bomoi Banzembo 2 Bible Online

Banzembo 2 - Mokanda na Bomoi bible

Banzembo 2

¹Mpo na nini bikolo ezali kosala makelele mpe bato bazali kosala makita ya pamba ?

²Bakonzi ya mokili batomboki, mpe bakambi basangani mpo na kotelemela Yawe elongo na mopakolami na Ye.

³Bazali koganga elongo : « Tokata minyololo na bango mpe tomikangola na bokonzi na bango ! »

⁴Kasi Ye oyo avandi na Kiti na Ye ya Bokonzi kuna na likolo aseki, Yawe atioli bango.

⁵Agangeli bango na kanda, apelisi kanda makasi na Ye mpo na bango, alobi :

⁶« Ezali Ngai nde natiaki mokonzi na Ngai na Siona, ngomba na Ngai ya bule. »

⁷Nakosakola mobeko ya Yawe. Alobaki na ngai : « Ozali Mwana na Ngai ya mobali, na mokolo ya lelo, nakomi Tata na Yo.

⁸Senga Ngai, mpe nakokomisa bikolo libula na Yo, basuka ya mokili bozwi na Yo.

⁹Okoyangela yango na bokonzi ya ebende, okopanza yango lokola mbeki ya mabele. »

¹⁰Yango wana, bino bakonzi, bozala na mayele ; bino bayangeli ya mokili, boyoka likebisi oyo.

¹¹Bosalela Yawe na kobanga mpe bosepela na kolenga.

¹²Bopesa Mwana na Ye beze, noki te akosilika mpe bokokufa na nzela na bino, pamba te kanda na Ye epelaka noki. Esengo na bato oyo bazwaka Ye lokola ebombamelo na bango.