Read Mokanda na Bomoi Banzembo 25 Bible Online

Banzembo 25 - Mokanda na Bomoi bible

Banzembo 25

¹Nzembo ya Davidi. Yawe, Nzambe na ngai, natiaka elikya na ngai kati na Yo.

²Nzambe na ngai, natiaka elikya na ngai kati na Yo ; sala ete nayoka soni te, mpe banguna na ngai basepela te na tina na ngai.

³Bato nyonso oyo batalelaka Yo bakotikala koyokisama soni ata moke te ; kaka ba-oyo bapesaka Yo mokongo nde bakoyokisama soni.

⁴Yawe, lakisa ngai nzela, teya ngai nzela oyo olingi ete nalanda.

⁵Kamba ngai kati na bosolo na Yo mpe pesa ngai mayele, pamba te ozali Nzambe, Mobikisi na ngai ; mpe ngai natiaka elikya na ngai kati na Yo tango nyonso.

⁶Yawe, kanisa mawa mpe bolingo na Yo, pamba te ezali mpo na libela na libela.

⁷Yawe, kokanisa te masumu mpe botomboki ya bolenge na ngai ; kanisa ngai kaka kolanda boboto na Yo, pamba te ozali malamu.

⁸Solo, Yawe azali malamu mpe alima ; atalisaka banzela na Ye epai ya bato ya masumu.

⁹Atambolisaka bato oyo bamikitisa, kati na banzela ya sembo, mpe ateyaka bango banzela na Ye.

¹⁰Banzela nyonso ya Yawe etalisaka bolingo mpe boyengebene na Ye mpo na bato oyo babatelaka boyokani mpe malako na Ye.

¹¹Yawe, mpo na bolingo ya Kombo na Yo, limbisa masumu na ngai, atako ezali minene.

¹²Banani bazali bato oyo batosaka Yawe ? Alakisaka bango nzela ya kopona.

¹³Boye, bakolekisa mikolo ya bomoi na bango kati na bofuluki, mpe mokili ekozala libula ya bana na bango.

¹⁴Yawe ayebisaka mabongisi na Ye epai ya bato oyo batosaka Ye, alakisaka bango mabombami ya boyokani na Ye.

¹⁵Natalelaka Yawe tango nyonso, pamba te kaka Ye nde akolongola makolo na ngai na motambo.

¹⁶Yawe, balola miso na Yo epai na ngai mpe salela ngai ngolu, pamba te nazali kaka ngai moko, mpe nazali monyokolami.

¹⁷Lembisa pasi ya motema na ngai mpe kangola ngai na mitungisi na ngai.

¹⁸Tala pasi mpe kolela na ngai, mpe limbisa masumu na ngai nyonso.

¹⁹Tala ndenge nini banguna na ngai bazali ebele, mpe ndenge nini bazali koyina ngai makasi !

²⁰Batela bomoi na ngai mpe kangola ngai ; sala ete nayoka soni te, pamba te nabombamaka kati na Yo.

²¹Lokola mpe natielaka Yo motema, tika ete bozangi pamela mpe bosembo ebatela ngai.

²²Nzambe, kangola Isalaele, na pasi na yango nyonso !