Read Mokanda na Bomoi Banzembo 33 Bible Online

Banzembo 33 - Mokanda na Bomoi bible

Banzembo 33

¹Bino bato ya sembo, bobeta milolo ya esengo na tina na Yawe ! Kokumisa Nzambe ebongi na bato oyo bazali alima.

²Bosanzola Yawe na nzenze, bosanzola Ye na lindanda ya basinga zomi.

³Boyembela Yawe nzembo ya sika, bobetisa bibetelo mindule elongo na koganga ya esengo.

⁴Pamba te Liloba na Yawe ezali alima, misala na Ye nyonso ekokisamaka na boyengebene.

⁵Yawe alingaka bosembo mpe alima ; mokili etondi na bolingo na Ye.

⁶Likolo ekelamaki na Liloba na Yawe ; mampinga na yango nyonso, na nzela ya pema ya monoko na Ye.

⁷Asangisaka mayi ya bibale minene esika moko, mpe atiaka yango na bisika ya mozindo.

⁸Tika ete mokili mobimba etosa Yawe ! Tika ete bavandi nyonso ya mokili balenga liboso na Ye.

⁹Pamba te alobaki, mpe likambo esalemaki ; mpe apesaki mitindo, mpe emonanaki.

¹⁰Yawe akweyisaka mikano ya bikolo, abebisaka mabongisi ya bato.

¹¹Kasi mikano ya Yawe etikalaka mpo na seko, mabongisi ya motema na Ye, mpo na bikeke nyonso.

¹²Esengo na ekolo oyo Yawe azali Nzambe na yango. Esengo na bato oyo aponaki mpo na libula na Ye.

¹³Yawe atalaka wuta na likolo, amonaka bana nyonso ya bato.

¹⁴Wuta na evandelo na Ye, atalaka bavandi nyonso ya mokili.

¹⁵Ye oyo asalaka mitema nyonso ya bato asosolaka makambo nyonso oyo basalaka.

¹⁶Ezali te limpinga monene nde ebikisaka mokonzi to nguya monene nde ekangolaka elombe.

¹⁷Mpunda ezali na nguya te ya kopesa lobiko, makasi na yango nyonso ekangolaka te.

¹⁸Nzokande Yawe atalaka bato oyo batosaka Ye, ba-oyo batiaka elikya na bolingo kati na Ye,

¹⁹mpo na kokangola bango na kufa mpe kobatela bango na bomoi ata na tango ya nzala makasi.

²⁰Totielaka Yawe motema ; azali lisungi mpe nguba na biso.

²¹Solo, mitema na biso esepelaka kati na Ye, pamba te totiaka elikya na biso kati na Kombo na Ye ya bule.

²²Yawe, lokola totiaka elikya na biso kati na Yo, tika ete bolingo na Yo ezala elongo na biso.