Read Mokanda na Bomoi Banzembo 34 Bible Online

Banzembo 34 - Mokanda na Bomoi bible

Banzembo 34

¹Nzembo ya Davidi. Ayembaki yango tango akosanaki liboma liboso ya Abimeleki oyo abenganaki ye, mpe akendeki.

²Nakopambola Yawe tango nyonso, nakokumisa Ye mikolo nyonso na bibebu na ngai.

³Tika ete bomoi na ngai emikumisa kati na Yawe ; tika ete banyokolami bayoka mpe basepela !

⁴Boya kosakola elongo na ngai ete Yawe azali monene ! Tonetola Kombo na Ye, biso nyonso.

⁵Nalukaki Yawe, mpe ayanolaki ngai ; akangolaki ngai na somo na ngai nyonso.

⁶Bato oyo batalaka epai na Ye bangengaka na esengo, mpe bayokisamaka soni ata moke te.

⁷Mobola agangaki, mpe Yawe ayokaka ye ; abikisaki ye na pasi na ye nyonso.

⁸Anjelu ya Yawe atongaka molako na ye zingazinga ya bato oyo batosaka Yawe, mpe akangolaka bango.

⁹Bomeka elengi mpe botala ndenge nini Yawe azali malamu ; Esengo na moto oyo azwaka Yawe lokola ebombamelo na ye !

¹⁰Bino basantu ya Yawe, botosa Yawe ; pamba te bato oyo batosaka Ye bazangaka eloko moko te.

¹¹Bana ya nkosi ezangaka mpe ekufaka nzala, kasi bato oyo balukaka Yawe bakozanga eloko moko.

¹²Bana na ngai, boya, boyoka ngai ; Nakolakisa bino kotosa Yawe.

¹³Nani asepelaka na bomoi ? Nani alingaka kobika mikolo ebele ya esengo ?

¹⁴Batela lolemo na yo mosika na mabe, mpe bibebu na yo ete eloba lokuta te.

¹⁵Zala mosika na mabe mpe sala bolamu, luka kimia mpe koba na yango.

¹⁶Miso ya Yawe etalaka bato ya sembo, mpe matoyi na Ye eyokaka koganga na bango ;

¹⁷kasi Yawe apesaka bato mabe mokongo mpo ete bakanisa bango lisusu te kati na mokili.

¹⁸Tango bato ya sembo babelelaka, Yawe ayokaka mpe akangolaka bango na pasi na bango nyonso.

¹⁹Yawe azali pene ya bato oyo bazoki na mitema mpe abikisaka ba-oyo balembi na milimo na bango.

²⁰Pasi mingi ekangaka moto ya sembo, kasi Yawe akangolaka ye na nyonso,

²¹abatelaka mikuwa na ye nyonso mpo ete moko te kati na yango ebukana.

²²Mabe ebomaka moto mabe, mpe bayini ya moto ya sembo bakozwa etumbu.

²³Yawe akangolaka bomoi ya basali na Ye ; mpe bato nyonso oyo bazwaka Ye lokola ebombamelo na bango bakozwa etumbu te.