Read Mokanda na Bomoi Banzembo 37 Bible Online

Banzembo 37 - Mokanda na Bomoi bible

Banzembo 37

¹Nzembo ya Davidi. Kosilikela bato ya mabe te, kosalela bato oyo basalaka mabe zuwa te ;

²pamba te bakokawuka noki lokola makasa, mpe bakolemba noki lokola matiti.

³Tia elikya na yo kati na Yawe mpe sala bolamu, vanda kati na mokili mpe lia na kimia.

⁴Komisa Yawe bilengi na yo ya makasi, mpe akokokisela yo posa ya motema na yo.

⁵Kaba bomoi na yo epai na Yawe, tia elikya kati na Ye, mpe akosala :

⁶akongengisa bosembo na yo lokola pole, makoki na yo lokola moyi ya midi.

⁷Batela kimia liboso ya Yawe mpe talela Ye ; kosilikela te moto oyo alongaka na misala na ye, mpe oyo asalaka mabongisi ya mabe.

⁸Boya kanda mpe kosilika te ; kotomboka te, noki te okosala mabe.

⁹Pamba te bato oyo basalaka mabe bakolimwa, kasi bato oyo batielaka Yawe motema bakozwa mokili lokola libula na bango.

¹⁰Etikali tango moke kaka, moto mabe akozala lisusu te ; ata oluki ye, okomona ye te.

¹¹Kasi bato oyo bamikitisa bakozwa mokili lokola libula na bango mpe bakozala na kimia makasi.

¹²Bato mabe basalelaka bato ya sembo makita mpe baliaka minu mpo na kotelemela bango.

¹³Kasi Yawe asekaka bato mabe, pamba te ayebi ete mokolo na bango ezali kobelema.

¹⁴Bato mabe babimisi mipanga mpe babongisi batolotolo mpo na kokweyisa mobola mpe moto oyo akelela, mpo na koboma bato oyo batambolaka alima.

¹⁵Kasi mipanga na bango ekotobola mitema na bango moko, mpe batolotolo na bango ekobukana.

¹⁶Mwa biloko ya moto ya sembo eleki bozwi ya bato ebele ya mabe,

¹⁷pamba te nguya ya bato mabe ekosila, kasi Yawe alendisaka bato ya sembo.

¹⁸Yawe ayebi mikolo ya bato bazangi pamela, mpe libula na bango ekowumela mpo na seko.

¹⁹Na tango ya pasi, bakokawuka te ; na mikolo ya nzala, bakozala na bilei ebele.

²⁰Kasi bato mabe bakokufa, banguna ya Yawe bazali lokola fololo ya elanga, bakolimwa lokola molinga.

²¹Moto mabe adefaka mpe azongisaka te, kasi moto ya sembo ayokaka mawa mpe akabaka.

²²Bato oyo Yawe apambolaka bakozwa mokili lokola libula na bango, kasi ba-oyo alakelaka mabe bakolimwa.

²³Soki Yawe asepeli na etamboli ya moto, alendisaka bomoi na ye ;

²⁴ezala akweyi, akotikala kaka ya kokweya te ; pamba te Yawe asimbaka ye na loboko.

²⁵Nazalaki elenge, mpe sik’oyo nakomi mobange, namoni nanu te moto ya sembo kosundolama to bana na ye kokoma kosenga-senga bilei.

²⁶Akabaka tango nyonso mpe adefisaka, bana na ye bakozalaka kati na mapamboli.

²⁷Zala mosika na mabe mpe sala bolamu, okovanda na mokili mpo na libela ;

²⁸pamba te Yawe alingaka bosembo, mpe asundolaka te bayengebene na Ye. Babatelamaka mpo na seko, kasi bana ya bato mabe bakolimwa.

²⁹Bato ya sembo bakozwa mokili lokola libula na bango mpe bakovanda kuna seko na seko.

³⁰Monoko ya moto ya sembo ebimisaka bwanya, mpe lolemo na ye elobaka kolanda bosembo.

³¹Mobeko ya Nzambe na ye ezali kati na motema na ye, makolo na ye ebetaka libaku te.

³²Moto mabe atalaka moto ya sembo na miso mabe mpe alukaka nzela ya koboma ye,

³³kasi Yawe akosundola moto ya sembo te kati na maboko ya moto mabe, mpe akokweyisa ye te na kosambisama.

³⁴Zala na elikya kati na Yawe mpe batela nzela na Ye ; akonetola Yo mpo ete ozwa mboka lokola libula na yo, mpe okomona tango bato mabe bakolimwa.

³⁵Namonaki moto mabe mpe na kanza kokoma na nguya mpe kofuluka lokola nzete oyo ezali kokola na mabele na yango,

³⁶kasi alekaki noki mpe azalaki lisusu te ; nalukaki ye, kasi namonaki ye lisusu te.

³⁷Tala malamu moto oyo azangi pamela, landela bomoi ya moto ya sembo ; tango oyo ezali koya ezali kozela moto ya kimia.

³⁸Kasi batomboki bakobebisama, tango oyo ezali koya ezali te mpo na bato mabe.

³⁹Lobiko ya bato ya sembo ewutaka epai ya Yawe oyo, na tango ya pasi, azali ndako na bango, oyo batonga makasi.

⁴⁰Yawe asungaka mpe akangolaka bango, akangolaka bango wuta na maboko ya bato mabe mpe abikisaka bango, pamba te babombamaka kati na Ye.