Read Mokanda na Bomoi Banzembo 38 Bible Online

Banzembo 38 - Mokanda na Bomoi bible

Banzembo 38

¹Nzembo ya Davidi mpo na kokanisa.

²Yawe, kopamela ngai te kati na kanda na Yo to kopesa ngai etumbu te kati na kanda makasi na Yo.

³Pamba te makonga na Yo etoboli ngai, mpe loboko na Yo ebeti ngai.

⁴Mpo na kanda na Yo, nzoto na ngai ebeli ; mpo na masumu na ngai, mikuwa na ngai elembi.

⁵Mabe na ngai eleki moto na ngai, ezali kilo makasi epai na ngai lokola mokumba ya kilo makasi.

⁶Bapota na ngai epoli mpe ekomi kolumba solo mpo na bozoba na ngai.

⁷Nagumbami, nalembi makasi ; nakomi moto ya mawa mpo na libela.

⁸Pamba te nazali koyoka pasi makasi na mokongo na ngai, eteni ata moko te ya nzoto na ngai ezali malamu.

⁹Nalembi, makasi na ngai nyonso esili ; mobulu ekoti na motema na ngai, nakomi koganga na kolemba te.

¹⁰Nkolo, oyebi posa na ngai nyonso ; kolela na ngai ezali ya kobombama te na miso na Yo.

¹¹Motema na ngai ezangi kimia, makasi na ngai ekomi kosila, nabungisi ata pole ya miso na ngai.

¹²Bato oyo balingaka ngai mpe baninga na ngai bakimi pasi na ngai, ba-oyo bazalaka na ngai esika moko batelemi mosika na ngai.

¹³Bato oyo balukaka kufa na ngai bazali kotia mitambo, ba-oyo balukaka pasi na ngai bazali koloba mpo na kosala ngai mabe, bakomi mikolo nyonso kobongisa lokuta.

¹⁴Kasi ngai nazali kosala lokola mokufi matoyi ; mpe lokola baba, nakangi monoko, naboyi koloba.

¹⁵Nakomi lokola mokufi matoyi oyo akoki kopesa eyano ata moko te na monoko na ye.

¹⁶Yawe, natiaka elikya na ngai kati na Yo ; oh Nkolo, Nzambe na ngai, solo, okoyanola.

¹⁷Nalobaki : « Kopesa nzela te ete basepela na tina na ngai to bamitombola likolo na ngai soki nabeti libaku. »

¹⁸Pamba te nakomi pene ya kokweya, pasi na ngai ezali kaka elongo na ngai tango nyonso.

¹⁹Solo nandimi mabe na ngai, masumu na ngai ezali kotungisa molimo na ngai.

²⁰Banguna na ngai bazali makasi mpe bingambe, bato oyo bayinaka ngai kaka pamba bazali ebele.

²¹Bato oyo bazongisaka mabe na bolamu bazali kofunda ngai atako nalukaka kosala bolamu.

²²Yawe, kosundola ngai te ; Nzambe na ngai, kozala mpe mosika na ngai te.

²³Nkolo, Mobikisi na ngai, yaka noki kosunga ngai.