Read Mokanda na Bomoi Banzembo 39 Bible Online

Banzembo 39 - Mokanda na Bomoi bible

Banzembo 39

¹Wuta na buku ya mokambi ya bayembi mpe ya Yedutuni. Nzembo ya Davidi.

²Namilobelaki : « Nakosala keba na etamboli na ngai mpo ete monoko na ngai esala masumu te ; nakobatela penza monoko na ngai tango nyonso moto mabe akozala liboso na ngai. »

³Boye nakangaki monoko na ngai mpe navandaki nye, natikalaki koloba ata likambo moko te ; pasi na ngai ebakisamaki makasi.

⁴Motema na ngai eswaki, moto ezalaki kopela kati na ngai, mpe nalobaki na nzela ya monoko na ngai.

⁵Yawe, yebisa ngai tango nini bomoi na ngai ekosuka mpe motango ya mikolo ya bomoi na ngai mpo ete nasosola ete bomoi na ngai ezali kaka mpo na mwa tango moke.

⁶Solo mikolo ya bomoi na ngai ekatama, ezali pamba na miso na Yo. Bomoi ya moto nyonso ezali kaka mopepe.

⁷Moto akendaka mpe azongaka, azali kaka lokola elili ; amitungisaka kaka pamba, andukaka bomengo, kasi ayebaka te soki nani akotikala na yango.

⁸Sik’oyo, oh Nkolo, nazela lisusu nini ? Natiaka elikya na ngai kati na Yo.

⁹Bikisa ngai na mabe na ngai nyonso, kopesa nzela te na bazoba ete bafinga ngai.

¹⁰Nakangi monoko, nakoloba lisusu te, pamba te Yo nde osali.

¹¹Kobeta ngai lisusu te, nazali kokoka lisusu te.

¹²Opesaka bato etumbu mpo na masumu na bango mpo na kozongisa bango na nzela ; obebisaka biloko na bango ya motuya lokola nselele. Solo, moto nyonso azali kaka mopepe.

¹³Yawe, yoka libondeli na ngai ; yoka na bokebi, wana nazali koganga mpo na kosenga lisungi, kovanda nye te liboso ya mpinzoli na ngai, pamba te epai na Yo, nazali mopaya mpe moleki nzela lokola bakoko na ngai.

¹⁴Kotala ngai te mpo ete nasepela lisusu, liboso ete nakende na ngai mpe nazala lisusu te.