Read Mokanda na Bomoi Banzembo 41 Bible Online

Banzembo 41 - Mokanda na Bomoi bible

Banzembo 41

¹Nzembo ya Davidi. Wuta na buku ya mokambi ya bayembi.

²Esengo na moto oyo akanisaka mobola ! Yawe akokangola ye na tango ya pasi.

³Yawe akokengela ye mpe akobatela bomoi na ye, akokomisa ye moto ya esengo kati na mokili mpe akokaba ye te na maboko ya banguna na ye.

⁴Yawe akosunga ye na mbeto na ye soki abeli mpe akobikisa ye na bokono na ye nyonso.

⁵Nalobaki : « Oh Yawe, yokela ngai mawa ; bikisa ngai na bokono, pamba te nasalaki masumu epai na Yo. »

⁶Banguna na ngai balobaka mabe na tina na ngai : « Akokufa mokolo nini mpo ete kombo na ye etangama lisusu te ? »

⁷Kati na bango, moto nyonso oyo ayaka kotala ngai alobaka kaka lokuta mpo na kobebisa lokumu na ngai, akangisaka kati na ye makambo ya lokuta mpe, soki kaka abimi libanda, apanzaka yango na matongi.

⁸Banguna na ngai basanganaka kaka mpo na kotonga ngai mpe kokanisa mpo na libebi na ngai.

⁹Balobaka : « Pasi moko ya somo penza ekangi ye, ebwaki ye na mbeto mpe azali kokoka lisusu kotelema te. »

¹⁰Ezala molingami na ngai ya kimia, oyo nazalaki kotiela motema mpe azalaki kolia sani moko elongo na ngai, abalukeli ngai.

¹¹Kasi Yo, Yawe, yokela ngai mawa mpe telemisa ngai mpo ete nazongisela bango mabe na mabe.

¹²Nakoyeba ete osepelaka na ngai soki kaka monguna na ngai agangi te na tina na ngai.

¹³Mpo ete nazangi pamela, okosunga ngai mpe okovandisa ngai na makolo na Yo mpo na libela.

¹⁴Tika ete Yawe, Nzambe ya Isalaele, akumisama libela na libela ! Amen ! Amen !