Read Mokanda na Bomoi Banzembo 44 Bible Online

Banzembo 44 - Mokanda na Bomoi bible

Banzembo 44

¹Nzembo ya bana ya Kore. Wuta na buku ya mokambi ya bayembi.

²Nzambe, toyokaki na matoyi na biso ; bakoko na biso babetelaki biso lisolo ya makambo oyo osalaki na tango na bango, na tango ya kala.

³Na nguya na Yo, obenganaki bikolo mpe otiaki bakoko na biso ; obetaki bikolo ya bapaya mpe ofulukisaki bakoko na biso.

⁴Pamba te ezalaki na mopanga na bango te nde babotolaki mokili, ezalaki mpe maboko na bango te nde ebikisaki bango ; kasi ezalaki nde loboko na Yo ya mobali, nguya na Yo mpe pole ya elongi na Yo, pamba te ozalaki kolinga bango.

⁵Oh Nzambe, Yo oyo ozali Mokonzi na ngai, pesa mitindo mpo na elonga ya Jakobi.

⁶Na lisungi na Yo, tolongaka banguna na biso, mpe na Kombo na Yo, tonyataka bayini na biso.

⁷Pamba te natiaka elikya te na tolotolo na ngai, mpe mopanga na ngai ebikisaka ngai te.

⁸Kasi ezali Yo nde obikisaka biso wuta na maboko ya bayini na biso, mpe oyokisaka bayini na biso soni.

⁹Tomikumisaka mikolo nyonso kati na Nzambe mpe tokokumisa Kombo na Yo mpo na libela.

¹⁰Kasi obwaki biso, oyokisi biso soni mpe ozali lisusu kotambola te elongo na mampinga na biso.

¹¹Otiki biso kokima liboso ya banguna na biso ; mpe bayini na biso bazwi biloko na biso na makasi.

¹²Osundoli biso na maboko na bango lokola bameme ya koboma mpe opanzi biso kati na bikolo.

¹³Oteki bato na Yo na pamba mpe ozwi ata litomba te kowuta na boteki yango.

¹⁴Okomisi biso eloko ya lisuma na miso ya bato oyo bazali pembeni na biso, eloko ya litio mpe ya liseki na miso ya bato oyo bazali zingazinga na biso.

¹⁵Okomisi biso lisapo kati na bikolo, mpe bato bakomi koningisa mito na bango mpo na biso.

¹⁶Kosambwa ekomi tango nyonso liboso na ngai mpe soni ezipi elongi na ngai,

¹⁷mpo na litio ya bato oyo bazali kofinga mpe kopamela ngai, mpe ya monguna oyo akangela ngai kanda.

¹⁸Makambo wana nyonso ekweyeli biso atako tobosanaki Yo te mpe tobebisaki Boyokani na Yo te,

¹⁹atako mitema na biso epengwaki te mpe totamboli libanda ya nzela na Yo te.

²⁰Pamba te onyokolaki biso kati na etando ya bambwa ya zamba mpe ozipaki biso na molili makasi.

²¹Soki tobosanaki Kombo ya Nzambe na biso to totombolaki maboko na biso epai ya nzambe ya mopaya,

²²boni, Nzambe na biso alingaki koyeba yango te, lokola asosolaka mozindo ya mitema ?

²³Pamba te, likolo na Yo, babomaka biso mikolo nyonso mpe bazwaka biso lokola bameme ya koboma.

²⁴Nkolo, lamuka ! Mpo na nini ozali kolala ? Lamuka, kobwaka biso te mpo na libela.

²⁵Yawe, mpo na nini ozali kobomba elongi na Yo ? Mpo na nini ozali kobosana pasi mpe minyoko na biso ?

²⁶Pamba te tokweyi na putulu, mpe nzoto na biso ekangami na mabele.

²⁷Telema, yaka kosunga biso, kangola biso mpo na bolingo na Yo !