Read Mokanda na Bomoi Banzembo 49 Bible Online

Banzembo 49 - Mokanda na Bomoi bible

Banzembo 49

¹Nzembo ya bana ya Kore. Wuta na buku ya mokambi ya bayembi.

²Bino bikolo nyonso, boyoka malamu makambo oyo ; bino bavandi nyonso ya mokili, boyoka,

³bato pamba mpe bato minene, bazwi mpe babola :

⁴Monoko na ngai ekoloba maloba ya bwanya ; motema na ngai ekanisi makambo oyo ekopesa bino bososoli.

⁵Nayokaka masese, mpe nalimbolaka sambole na nzela ya lindanda.

⁶Mpo na nini nabanga na tango ya pasi, tango mabe ya bakosi ezingeli ngai,

⁷ba-oyo batielaka bomengo na bango motema mpe bamikumisaka mpo na bofuluki ya bozwi na bango ?

⁸Moko te akoki kosikola ndeko na ye, moko te akoki kofuta mbongo epai ya Nzambe mpo na lisiko na ye.

⁹Talo ya bomoi na ye eleki motuya makasi, mpe ekotikala kofutama te.

¹⁰Akokaki kozala na bomoi libela na libela, mpe akokaki kokufa te.

¹¹Solo, tomonaka bato ya bwanya kokufa elongo na zoba mpe moto oyo azangi mayele, mpe batikaka bomengo na bango epai ya bato mosusu.

¹²Bakunda na bango nde ekomaka bandako na bango mpo na libela, mpe bisika na bango ya kovanda mpo na seko na seko, atako bapesaki na bitando na bango ya mabele bakombo na bango mpo ete ebengamaka na yango.

¹³Mozwi akowumelaka te na bomoi ; ata aleki na lokumu, akokani na nyama oyo ezali kokufa.

¹⁴Yango nde suka ya bato oyo batiaka elikya kati na bango moko, ya bato oyo balandaka bango mpe basepelaka na maloba na bango.

¹⁵Bazali lokola bameme mpe babongisami mpo na mboka ya bakufi ; kufa ekokoma kobokola bango. Kala te, bato ya sembo bakonyata bango, kitoko na bango ekonzuluka, mpe mboka ya bakufi ekokoma ndako na bango.

¹⁶Kasi Nzambe akokangola bomoi na ngai wuta na maboko ya mboka ya bakufi, pamba te akokamata ngai.

¹⁷Komitungisaka te soki moto moko akomi kofuluka na bozwi, soki kongenga ya ndako na ye ekomi komata se komata.

¹⁸Pamba te akomema ata eloko moko te tango akokufa ; bomengo na ye ekolanda ye te.

¹⁹Atako, wana azalaki na bomoi, azalaki komimona moto apambolama— atako bato bakokumisa yo, pamba te omisali bolamu—

²⁰okokende kaka kokutana na bakoko na yo oyo bakotikala komona lisusu pole te.

²¹Moto oyo azali mozwi, kasi azangi bososoli, azali lokola nyama oyo ezali kokufa.