Read Mokanda na Bomoi Banzembo 5 Bible Online

Banzembo 5 - Mokanda na Bomoi bible

Banzembo 5

¹Wuta na buku ya mokambi ya bayembi. Nzembo ya Davidi ; ezali ya koyemba na flite.

²Oh Yawe, yoka maloba na ngai, sosola tina ya kolelalela na ngai.

³Mokonzi na ngai mpe Nzambe na ngai, yoka koganga na ngai wana nazali kosenga lisungi, pamba te nazali kobondela nde Yo.

⁴Yawe, na tongo, oyokaka mongongo na ngai ; na tongo, nabelemaka mpo na kosenga epai na Yo mpe nazelaka.

⁵Pamba te ozali Nzambe te oyo asepelaka na mabe, mpe moto mabe akoki kutu te kovanda elongo na Yo.

⁶Bato ya lolendo bakoki te kotelema liboso na Yo. Oyinaka bato nyonso oyo basalaka mabe.

⁷Obomaka bato oyo balobaka lokuta. Yo, Yawe, oyinaka babomi mpe bakosi.

⁸Kasi mpo ete bolingo na Yo eleki monene, nakoki kokota kati na Ndako na Yo, nakoki kofukama mpo na botosi epai ya Tempelo na Yo ya bule.

⁹Yawe, tambolisa ngai na bosembo na Yo, pamba te nazali na banguna ; bongisa nzela oyo olingi ete natambola na yango.

¹⁰Minoko na bango elobaka kaka lokuta, mitema na bango etondi na mabe. Minoko na bango ezali lokola bakunda ya kofungwama, mpe bakosaka na nzela ya lolemo na bango.

¹¹Oh Nzambe, katela bango etumbu. Tika ete mabongisi na bango ebotela bango libebi. Bengana bango mpo na ebele ya masumu na bango, pamba te batombokeli nde Yo.

¹²Kasi tika ete bato nyonso oyo bazwaka Yo lokola ebombamelo na bango bazalaka na esengo tango nyonso, tika ete bayembaka mpo na esengo, bomoi na bango mobimba. Batela bango mpo ete bato oyo balingaka Kombo na Yo basepelaka kati na Yo.

¹³Oh Yawe, solo, opambolaka bato ya sembo mpe ozingelaka bango na nzela ya ngolu na Yo lokola na nzela ya nguba.