Read Mokanda na Bomoi Banzembo 52 Bible Online

Banzembo 52 - Mokanda na Bomoi bible

Banzembo 52

¹Nzembo ya Davidi. Wuta na buku ya mokambi ya bayembi.

²Eyembamaki tango Doegi, moto ya Edomi, akendeki koyebisa Saulo ete Davidi akoti na ndako ya Ayimeleki.

³Yo elombe, mpo na nini ozali komikumisa na tina na mabe ? Bolingo ya Nzambe emonanaka mikolo nyonso.

⁴Yo oyo otambolaka na lokuta, lolemo na yo esalaka mabongisi ya libebi, ekosaka lokola mbeli bapelisa malamu.

⁵Olingaka mabe koleka bolamu, lokuta koleka koloba bosolo.

⁶Oh lolemo ya lokuta, olingaka maloba nyonso oyo epanzaka.

⁷Solo, Ye moko Nzambe akobebisa yo mpo na libela, akokanga yo kati na ndako na yo, akobwaka yo libanda mpe akopikola yo na mokili ya bato ya bomoi.

⁸Bato ya sembo bakomona mpe bakokoma na somo, bakotiola ye na maloba oyo :

⁹« Tala moto oyo azalaki te kozwa Nzambe lokola ebombamelo na ye, azalaki kotiela bozwi na ye motema, mpe kobakisa makasi na ye na nzela ya kobebisa bato mosusu. »

¹⁰Kasi ngai, kati na Ndako na Yo, nazali lokola nzete ya olive oyo etondi na makasa ya mobesu ; natiaka tango nyonso elikya na ngai kati na bolingo monene ya Nzambe, mpo na libela.

¹¹Nakosanzola Yo mikolo nyonso, mpo na oyo osali ; mpe nazalaka na elikya kati na Kombo na Yo, pamba te ozali malamu mpo na bayengebene na Yo.