Read Mokanda na Bomoi Banzembo 59 Bible Online

Banzembo 59 - Mokanda na Bomoi bible

Banzembo 59

¹Wuta na buku ya mokambi ya bayembi. Eyembamaki ndenge moko na « Kobebisa te ! » tango Saulo atindaki bato kozingela ndako ya Davidi mpo na koboma ye. Nzembo ya Davidi.

²Oh Nzambe na ngai, kangola ngai wuta na maboko ya banguna na ngai ; batela ngai liboso ya banyokoli na ngai.

³Kangola ngai wuta na maboko ya bato ya misala mabe, mpe bikisa ngai liboso ya basopi makila ya bato.

⁴Yawe, bazali koluka koboma ngai ; bato na nguya basaleli ngai likita, nzokande nasali mabe te, nasali na ngai mpe masumu te.

⁵Nasali mabe ata moko te ; kasi bango bazali kopota mbangu, bazali komibongisa. Lamuka mpo na koya kokutana na ngai, mpe tala.

⁶Yawe, Nzambe-Na-Nguya-Nyonso, Nzambe ya Isalaele, telema mpo na kopesa bikolo nyonso etumbu ; koyokela bato nyonso oyo basalaka mabe mawa te.

⁷Bazongaka na pokwa, bagangaka lokola bambwa mpe batambolaka zingazinga ya engumba.

⁸Na nzela ya minoko na bango, babimisaka na bibebu na bango maloba oyo ezokisaka lokola mipanga ; bamilobelaka : « Nani azali koyoka biso ? »

⁹Kasi Yo, Yawe, osekaka bango, otiolaka bikolo nyonso.

¹⁰Nzambe, ozali makasi na ngai, nakotalela Yo ; ozali ebombamelo na ngai,

¹¹Nzambe na ngai, oyo nalingaka. Nzambe ayaka kino liboso na ngai, atikaka ngai kotala banguna na ngai.

¹²Nkolo, nguba na biso, koboma bango te, noki te bato na ngai bakobosana. Na nguya na Yo, sala ete bayengayenga, mpe mema bango kino na se.

¹³Mpo na masumu ya minoko na bango, mpo na maloba ya bibebu na bango, tika ete bakangama na motambo ya lolendo na bango. Mpo na bilakeli mabe mpe lokuta na bango,

¹⁴bebisa bango na kanda na Yo, bebisa bango kino bazala lisusu te. Bongo bakoyeba ete Nzambe azali kokonza kati na Jakobi kino na suka ya mokili.

¹⁵Bazongaka na pokwa, bagangaka lokola bambwa mpe batambolaka zingazinga ya engumba.

¹⁶Bayengaka-yengaka mpo na koluka bilei ; soki batondi te, balekisaka butu na kolelalela.

¹⁷Kasi ngai nakoyembela makasi na Yo, nakobetela bolingo na Yo milolo, na tongo, pamba te ozali ebombamelo na ngai, mpe ekimelo na ngai na tango ya pasi.

¹⁸Ozali makasi na ngai, nakoyemba mpo na lokumu na Yo ; ozali ebombamelo na ngai, oh Nzambe ; Nzambe na ngai, oyo nalingaka.